Bakı, 23 avqust (AZƏRTAC). Hazırlığını Naxçıvan şəhər stadionunda davam etdirən “Araz” futbol komandasının üzvləri avqustun 26-da Türkiyəyə təlim-məşq toplanışına yollanacaqlar.

Klubdan AZƏRTAC-a bildirmişlər ki, komanda hazırlığı Ərzurum şəhərində keçirəcəkdir. Qardaş ölkəyə 32 nəfərlik heyətlə yollanacaq Naxçıvan təmsilçisi orada iki yoldaşlıq matçı keçirməyi planlaşdırır. Avqustun 27-də yerli “Ərzurumspor” ilə qarşılaşacaq “Araz” iki gün sonra “Çaykur Rizespor” ilə oyunda gücünü sınayacaqdır.

On günlük hazırlıqdan sonra “Araz” Naxçıvana geri dönərək məşqləri yerli arenada davam etdirəcəkdir. Yerli azarkeşlər önündə komanda daha bir yoldaşlıq matçı keçirəcəkdir. Hələlik əqibin kimliyi bilinməsə də, yaxın vaxtlarda bu məsələ öz həllini tapacaqdır.