Nazir müavini: Bu ilin on ayında Azərbaycanın ticarət balansının profisiti 15 milyard dollardan çox olub
Bakı, 17 noyabr, AZƏRTAC
Neft və qazın dünya bazar qiymətlərinin ötən illə müqayisədə aşağı düşməsinə baxmayaraq, xarici ticarət balansında böyükhəcmli profisit müşahidə olunmaqdadır. Belə ki, cari ilin 10 ayında ixrac 29 milyard ABŞ dollarını ötüb, ticarət balansının profisiti 15 milyard ABŞ dollarından çox olub.
AZƏRTAC xəbər verir ki, bunu Milli Məclisin iqtisadi siyasət, sənaye və sahibkarlıq komitəsinin bu gün keçirilən iclasında iqtisadiyyat nazirinin müavini Sahib Məmmədov deyib.
Onun sözlərinə görə, qeyri-neft-qaz sektoru üzrə ixrac isə 11 faiz dən çox artaraq 2,7 milyard ABŞ dollarını ötüb. Emal olunmuş kənd təsərrüfatı məhsullarını çıxmaqla, qeyri-neft sənaye məhsullarının qeyri-neft-qaz ixracında payı 68 faizə çatıb. Cari ilin doqquz ayında qeyri-neft-qaz sənayesi məhsullarının ixracında sənaye zonalarının payı 23 faiz olub. “Hesab edirik ki, həyata keçirilən islahatlar məhz qeyri-neft ixracının da artırılmasında öz müsbət rolunu oynayacaq”, - deyə nazir müavini əlavə edib.
Bölmənin digər xəbərləri
