Bakı, 16 sentyabr, AZƏRTAC

Respublikaçılar partiyasından prezidentliyə namizəd Donald Trampa qarşı sui-qəsd cəhdində şübhəli bilinən 58 yaşlı Rayan Uesli Ruta qarşı Şimali Karolina ştatında indiyədək 100-dən çox cinayət işi açılıb.

AZƏRTAC xəbər verir ki, NBC telekanalının məlumatına görə, barəsində çoxsaylı “cinayət və mülki işlər” qaldırılan şübhəlinin qanunsuz pulemyota sahib olmaq, gizli silah gəzdirmək, oğurluq əşyalar saxlamaq, qəza yerindən qaçmaq və həbs olunarkən müqavimət göstərmək kimi cinayətlər üzrə məhkumluğu mövcuddur. Ümumilikdə isə Ruta qarşı indiyədək 100-dən çox cinayət işi açılıb və onun bir neçə inzibati qanun pozuntusuna yol verdiyi aşkarlanıb.

Qeyd edək ki, sentyabrın 15-də Florida ştatında Trampın qaldığı otelin qolf klubunda atəş səsləri eşidilib. Xüsusi xidmət orqanlarının əməkdaşları kolların arasında gizlənərək içəri daxil olmağa çalışan şəxsi saxlayarkən odlu silahdan istifadə edib. Onun gizləndiyi yerdə optik nişangahlı AK-47 avtomatı, iki çanta və “GoPro” kamerası aşkarlanıb. Faktla bağlı araşdırma başlayıb.

ABŞ hakimiyyət orqanları hadisəni Donald Trampa qarşı sui-qəsd cəhdi kimi qiymətləndirib.