Bakı, 22 oktyabr (AZƏRTAC). Xəbər verildiyi kimi, Azərbaycan Respublikasının Prezidenti yanında Gənclər Fondunun maliyyə dəstəyi, Azərbaycan İntellektual Oyunlar Federasiyası, Azərbaycan Müəllimlər İnstitutu, “İrəli” İctimai Birliyi, “Xəzər” İntellektual Gənclər Klubu və “MFX Group”un birgə təşkilatçılığı ilə “Nə? Harada? Nə zaman?” intellektual oyunu üzrə VI Çağırış Kuboku yarışları keçiriləcəkdir.

“Xəzər” İntellektual Gənclər Klubundan AZƏRTAC-a bildirmişlər ki, “Nə? Harada? Nə zaman?” Klublarının Beynəlxalq Assosiasiyası (KBA) VI Çağırış Kuboku yarışlarının ölkəmizdə keçirilməsi üçün lisenziya vermişdir. Bu barədə “Nə? Harada? Nə zaman?” Klublarının Beynəlxalq Assosiasiyasının lisenziya komitəsinin rəhbəri Aleksandr Druz bildirmişdir. Turnirin lisenziya alması yarışda iştirak edəcək komandaların beynəlxalq reytinqdə müvafiq xallar almaları ilə nəticələnəcəkdir. Bu da öz növbəsində Azərbaycan komandalarının beynəlxalq reytinqdə irəliləməsinə imkan yaradacaqdır.

“Nə? Harada? Nə zaman?” Klublarının Beynəlxalq Assosiasiyasının 2012-2013-cü illərdə tələbələr üçün qoyduğu yaş senzinə uyğun olaraq VI Çağırış Kuboku yarışlarında 1989-cu il sentyabrın 1-dən sonra doğulan şəxslər iştirak edə bilərlər.

Kubokun seçim turları noyabr ayının 16-da Bakıda, 23-də isə regionlarda keçiriləcəkdir.

Seçim turlarında ən yaxşı nəticə göstərmiş 60 komanda “Nə? Harada? Nə zaman?” oyunu üzrə VI Çağırış Kubokunun Bakıda təşkil olunacaq finalına vəsiqə qazanacaqdır.

Kubok yarışlarında http://telebe.az/nə-harada-nə-zaman-oyunu-uzrə-vi-cagiris-kuboku/ linkində qeydiyyatdan keçməklə iştirak etmək mümkündür.