Neftçi olmaq istəyən abituriyent imtahanda 400 bal topladı - REPORTAJ VİDEO
Neftçala, 20 iyun, İsmayıl Cəfərli, AZƏRTAC
Dövlət İmtahan Mərkəzinin iyunun 1-də keçirdiyi imtahanda I ixtisas qrupu üzrə iki nəfər ən yüksək - 400 bal toplayıb. Bu iki nəfərdən biri Neftçalanın Bankə qəsəbəsində yaşayan Mirağa İxtiyar oğlu Əliyevdir.
AZƏRTAC xəbər verir ki, ailədə iki bacı, bir qardaş olan Mirağa neftçi olmaq arzusuna çatmaq üçün daim öz üzərində çalışıb. O, Bankə qəsəbəsi Səməd Vurğun adına 2 saylı tam orta məktəbin məzunudur. Mirağa elə uşaq yaşlarından dəqiq elmlərə maraq göstərib. “Buraxılış imtahanlarında 275, blok imtahanında 400 bal - maksimum nəticə toplamışam. Bu nəticəni yığmaq üçün çox əziyyət çəkmişəm. Axırda da əziyyətimin bəhrəsini gördüm. Dostlarım, ailəm, müəllimlərim də çox sevinirlər. Bu uğura çatmağımda, ilk növbədə, valideynlərimin çox əziyyəti olub. Mənimlə məşğul olublar, məşğələlərə yazdırıblar, oxumağım üçün lazımi şərait yaradıblar. Təbii ki, müəllimlərin də əziyyəti danılmazdır. Fizika-riyaziyyat müəllimi Abdul müəllim mənimlə çox məşğul olub, bu fənləri mənə sevdirib”, - deyə o bildirib.
Mirağa deyir ki, gələcəkdə neft sektoru üzrə oxumaq və çalışmaq arzusundadır: “Gələcəkdə inşallah neft-qaz mühəndisi olmaq arzusundayam. Təhsilimi də Bakı Ali Neft Məktəbində almaq istəyirəm. Bu yolda mənə dəstək olduqlarına görə müəllimlərimə, valideynlərimə təşəkkür edirəm”.
Mirağanın dediyi kimi, onun bu uğurunda müəllimləri qədər valideynlərinin də əməyi var. Anası Sevinc xanımın arzusu Mirağanın gələcəkdə Vətənə layiqli övlad olmasıdır: “Qürurverici hissdir. Bütün valideynlərə arzulayıram ki, uşaqları belə yüksək nəticələr göstərsinlər. Bu qüruru onlar da yaşasınlar. Çox gözəl hissdir. Mirağaya gələcək həyatında daha böyük uğurlar arzulayıram”.
400 bal toplayan Mirağa Əliyev boş vaxtlarında güləşlə məşğul olmağı, şahmat oynamağı və kitab oxumağı çox sevir. Deyir ki, çəkilən zəhmət heç vaxt yerdə qalmır. Mirağa ali məktəbi bitirəndən sonra təhsilini xaricdə davam etdirmək, sonra isə ölkəmizə qayıdaraq bir mütəxəssis kimi Vətənə xidmət etmək niyyətindədir.
Bölmənin digər xəbərləri
