Bakı, 14 dekabr, AZƏRTAC

Azərbaycan beynəlxalq əhəmiyyətli tədbirlərə ev sahibliyi etməklə qlobal proseslərin fəal iştirakçısına çevrilməkdə davam edir. Bir neçə həftə öncə dünya ictimaiyyətinin diqqəti Azərbaycanda keçirilən COP29 iqlim sammitinə yönəlmişdi. Bu konfrans iqlim dəyişikliyi ilə mübarizə kontekstində, həm qlobal həm də regional miqyasda həlledici əhəmiyyət daşıyan məsələlərin müzakirəsi baxımından mühüm platformaya çevrildi. COP29-un təşkilatçılıq səviyyəsi və iştirakçıların fəallığı Azərbaycanın qlobal proseslərdəki nüfuzunu bir daha təsdiqlədi. Bu tədbirin müvəffəqiyyəti Azərbaycanın yalnız ev sahibliyi funksiyasını uğurla yerinə yetirməsi ilə deyil, həm də təşəbbüskar qismində çıxış etməsi ilə yadda qaldı. Ölkəmiz COP29 çərçivəsində dörd mühüm təşəbbüs irəli sürüb və bu təşəbbüslər təkcə dövlət sektorunu deyil, vətəndaş cəmiyyətini, özəl sektoru və digər tərəfdaş qurumları da əhatə edib.

AZƏRTAC xəbər verir ki, bu sözləri COP29 üzrə BMT-nin yüksəksəviyyəli iqlim çempionu, Milli Məclisin deputatı Nigar Arpadarai Bakıda “Sıfra doğru” şüarı altında keçirilən Sənaye Təhlükəsizliyi Zirvəsində çıxışı zamanı söyləyib.

Onun sözlərinə görə, COP29-un əsas uğurlarından biri dövlət, özəl sektor və vətəndaş cəmiyyəti arasında əməkdaşlığın gücləndirilməsi oldu: “İlk dəfə olaraq bu səviyyədə inklüziv iştirakçılıq təmin olunub və müxtəlif tərəflər arasında dialoq körpüləri qurulub. İqlim dəyişikliyi ilə mübarizənin hər bir ölkənin, hər bir sektorun və hər bir fərdin üzərinə düşən vəzifə olduğu nəzərə alınaraq, bu əməkdaşlığın davam etdirilməsi və genişləndirilməsi prioritet hədəf kimi müəyyənləşdirilib”.

N.Arpadarai iqlim dəyişikliyinə qarşı mübarizədə kənd təsərrüfatı, dayanıqlı iqtisadi inkişaf, yaşıl maliyyələşdirmə və rəqəmsal innovasiyaların tətbiqi kimi istiqamətlərin mühüm əhəmiyyət daşıdığını vurğulayıb. Bu sahələrdə dövlət və qeyri-dövlət strukturlarının tərəfdaşlığı, həmçinin özəl sektorun aktiv iştirakı dayanıqlılığın təmin olunmasına və sosial-iqtisadi inkişafın sürətləndirilməsinə şərait yaradacaq”.

O bildirib ki, Azərbaycanda COP29 dövrü üçün yeni yanaşma formalaşdırılıb: “Bu çərçivədə dövlət qurumları, vətəndaş cəmiyyəti və özəl sektor arasındakı əməkdaşlıq daha da gücləndiriləcək. Məqsəd yalnız qlobal proseslərdə iştirakçı olmaq deyil, həm də bu proseslərin təşəbbüskarı və istiqamətvericisinə çevrilməkdir”.

“COP29-un uğurla başa çatması Azərbaycanın iqlim dəyişikliyi sahəsində qlobal liderlik mövqeyini möhkəmləndirdi. Dövlət-özəl sektor-vətəndaş cəmiyyəti üçbucağında qurulan əməkdaşlıq mexanizmləri iqlim sahəsində yeni regional və qlobal layihələrin reallaşdırılmasına zəmin yaradır. Bu uğurlar ölkəmizin beynəlxalq arenadakı mövqeyini gücləndirməklə yanaşı, iqlim dəyişikliyi ilə mübarizə üzrə gələcək əməkdaşlıq platformalarının formalaşdırılmasına da təkan verir. Ölkəmizin irəli sürdüyü təşəbbüslərin qlobal tərəfdaşlar tərəfindən dəstəklənməsi isə iqlim təhlükəsizliyinin təmin edilməsində mühüm mərhələ olacaq”, - deyə N.Arpadarai əlavə edib.