Nizami Gəncəvi Beynəlxalq Mərkəzinin üzvləri Roma Papasının vəfatı ilə bağlı bəyanat yayıblar
Bakı, 22 aprel, AZƏRTAC
Nizami Gəncəvi Beynəlxalq Mərkəzinin üzvləri Roma Papası Fransiskin vəfatı ilə bağlı bəyanat yayıblar.
AZƏRTAC bəyanatın mətnini təqdim edir:
“Sülh, mərhəmət və dialoqa sadiqliyi ilə dünyamızda silinməz iz qoymuş liderin - Roma Papasının vəfatını dərin hüznlə yad edirik. Onun cəmiyyətin həssas təbəqələrinin müdafiəsində yorulmadan çalışması və dinlərarası dialoqa olan dərin bağlılığı milyonlarla insana ilham verərək müxtəlif mədəniyyətlər arasında anlayış ruhunu gücləndirib.
Roma Papası Fransisk harmoniya, dözümlülük və müxtəlif sivilizasiyalar arasında qarşılıqlı hörmətin təşviqinə yönəlmiş Nizami Gəncəvi Beynəlxalq Mərkəzinin missiyası ilə uyğun dəyərlərin təcəssümü idi. Onun 2019-cu ildə Mərkəzimizlə əməkdaşlığı mədəni diplomatiyanın əhəmiyyətini və iqlim dəyişikliyi ilə sosial ədalətsizlik də daxil olmaqla, qlobal problemlərin həlli üçün birgə səylərin vacibliyini vurğuladı.
Onun irsinə nəzər saldıqda, dialoqun daha dinc bir dünya qurmaq və müxtəliflikləri aradan qaldırmaq üçün nə qədər mühüm rol oynadığını bir daha xatırlayırıq. Katolik icmasına və onun sevgi, həmrəylik mesajından təsirlənən hər kəsə dərin hüznlə başsağlığı veririk.
Papa Fransiskin xatirəsinə hörmət əlaməti olaraq, biz anlayış və mərhəmət prinsipləri əsasında birləşmiş dünya vizyonunu davam etdirmək öhdəliyimizi bir daha təsdiqləyirik və insanlıq arasında əlaqələrin qurulmasına töhfə verməyə davam edəcəyik”.
Bölmənin digər xəbərləri
