NYU-YORK RESTORANI 175 DOLLARLIQ HAMBURGERLƏR TƏKLİF EDİR
AZƏRTAC xəbər verir ki, Uoll-stritdə yerləşən Nyu-York restoranı menyusuna 175 dollarlıq hamburger daxil etmişdir.
“Wall Street Burger Shoppe”nin sahibləri bildirmişlər ki, onlar müştərilərə, həqiqətən, nə isə qeyri-adi bir şey təklif etmək istəyirdilər.
Onlardan biri demişdir ki, Uoll-strit birjalarında yaxşı və pis günlər olur. Restoran hər gün 4 dollarlıq standart hamburger təklif edir, xüsusilə uğurlu gününü isə müştəri super-hamburger ilə qeyd edə bilər.
175 dollarlıq qiymətə haqq qazandırmaq üçün hamburgerə yapon delikates mal əti, qara göbələk, fua-qra, İsveçrə “Qrüyer” pendiri və meşə göbələkləri qoyurlar. Göbələklər bütün ili bitmədiyi üçün hamburgeri yalnız dekabr ayından mart ayınadək almaq olar.
