“OĞUZDUR ELİM MƏNİM” KİTABININ TƏQDİMATI OLMUŞDUR
Oğuz şəhərində yerli şair Nazim Hüseynlinin müəllifi olduğu “Oğuzdur elim mənim” kitabının təqdimat mərasimi keçirilmişdir.
Rayon icra hakimiyyətindən AZƏRTAC-a bildirmişlər ki, rayon rəhbərliyinin, ziyalıların, ədəbiyyat həvəskarlarının qatıldıqları tədbirdə Azərbaycan Yazıçılar Birliyi Şəki şöbəsinin rəhbəri, şair Vaqif Aslan müəllifin yaradıcılığı barədə məlumat vermişdir. Qeyd olunmuşdur ki, oxuculara təqdim edilən bu kitabda qədim Oğuz yurdu, bu diyarın əsrarəngiz təbiəti, gözəllikləri ilə yanaşı, rayonun yetişdirdiyi tanınmış elm və dövlət xadimlərinin, ziyalıların, sadə insanların, əmək qabaqcıllarının həyat və fəaliyyəti barədə də maraqlı məlumatlar toplanmışdır.
Təqdimat mərasimində Oğuz Rayon İcra Hakimiyyətinin başçısı Aydın Əlihüseynov, Sumqayıt Dövlət Universitetinin professoru Məhəmməd Əhmədov, tanınmış hüquqşünas Ənvər Seyidov və başqaları çıxış edərək kitab haqqında təəssüratlarını bölüşmüş, müəllifə yeni yaradıcılıq uğurları arzulamışlar.
Şair Nazim Hüseynli çıxış edərək kitabın ərsəyə gəlməsində xidməti olan insanlara minnətdarlığını bildirmiş, gələcək planları barədə danışmışdır.
Tədbirin sonunda qonaqlara “Oğuzdur elim mənim” kitabı hədiyyə edilmişdir.
Bölmənin digər xəbərləri
