Ordubad üzrə ən yüksək bal toplayan abituriyent: Məqsədim hüquqşünas olmaqdır, bu yolda inamla addımlayıram
Naxçıvan, 14 iyun, AZƏRTAC
Ordubad tarixən yetişdirdiyi ziyalıları, alimləri ilə Azərbaycan elminə sanballı töhfələr verib, mühüm elm və təhsil mərkəzlərindən biri kimi tanınıb. Müasir dövrdə də bu ənənə uğurla davam etdirilir, rayonun onlarla gənci öz biliyi, bacarığı sayəsində bölgənin adını ucaldırlar. 2024-2025-ci tədris ili də Ordubadın timsalında ürəkaçan təhsil uğurları ilə yadda qalmaqdadır.
AZƏRTAC-ın bölgə müxbiri xəbər verir ki, cari tədris ilində rayonun ümumtəhsil məktəblərinin XI sinfini 298-i adi, 22-si isə fərqlənmə attestatına layiq görülməklə 320 şagird bitirib. II-III qruplar üzrə 18 abituriyent 500-700 intervalında bal toplayıb. Ordubad şəhər 3 nömrəli tam orta məktəbin məzunu Elmira Əliyeva 643,1 balla rayon birincisi olub.
Məktəbin direktoru Anar Həsənli deyir ki, bu tədris ilində təhsil ocağından 35 şagird məzun olub, onlar həm buraxılış, həm də qəbul imtahanlarında yaxşı nəticə göstəriblər. Rayon məktəbləri arasında qəbul göstəricisi ən yüksək olan bu təhsil müəssisəsində qəbul faizinin 80 faizdən yuxarı olacağı gözlənilir: "Ötən il məktəbin 7 şagirdi 500-700 intervalında bal toplamışdı və bu il də nəticələrimiz eynidir. Rayonda II və III qruplar üzrə maksimal balı şagirdimiz Elmira Əliyeva toplayıb. Elmiranı birinci sinifdən tanıyıram. Ailəsinə də, özünə də yaxşı bələdəm. Çox məsuliyyətli şagirddir, müəllimlərinə qarşı da həmişə nümunəvi olub. Məlumdur ki, müəllimlər həmişə yaxşı oxuyan, çalışqan şagirdləri çox istəyərlər. Bu baxımdan Elmira da bizim seçilən, sevilən şagirdlərimizdəndir. Hətta tənəffüslərdə də Elmiranın kitab əlindən yerə düşməzdi. Sən çox oxuyursan deyəndə cavab verirdi ki, müəllim, mən ata-anama və müəllimlərimə yüksək bal toplayacağımı bildirmişəm. Həqiqətən də sözünün üstündə durdu. Deyərdim ki, müəllim-şagird-valideyn fəaliyyəti yüksək nəticənin əldə olunmasına şərait yaratdı".
Öyrənirik ki, Elmira Əliyevanın ən çox maraq göstərdiyi fənlərdən birincisi tarix olub. Ona bu fənni sevdirən isə müəllimi Gülər Məmmədlidir. “Elmiraya 6-cı sinifdən tarix dərsi deyirəm. O, öz diqqətcilliyi, dərsə yanaşması ilə öndə gedən şagirdlərdən biri olub. Onu da qeyd edim ki, Elmira Əliyevlər ailəsinin şagirdim olan ikinci üzvüdür. Böyük bacısı tarix fənni üzrə olimpiada birincisi olmuşdu. O, 30 sualın 30-da düz yazmışdı. Elmira isə 28-ni düz yazıb. Blok imtahanı verməmişdən öncə deyirdim ki, sən Ordubad birincisi olacaqsan. Halal olsun, ümidimi layiqincə doğrultdu. Şagirdimlə qürur duyuram. Fəxr edirəm ki, belə bir ailə tanımışam və bu ailənin iki övladına dərs demişəm", - deyə Gülər Məmmədli vurğulayıb.
Elmira Əliyevanın anası Vəfa xanım övladı ilə qürur hissi keçirdiyini bildirir: "Biz bu uğurlu nəticəni qazanmaq üçün Elmira və müəllimləri ilə birlikdə gərgin əmək sərf etmişik. Övladımın timsalında bütün məzunları, yüksək bal toplayanları təbrik edirəm, yolları açıq olsun. Hansı sənət sahibi olmalarından asılı olmayaraq hər birinin Vətənə, millətə xeyirli övlad kimi yetişmələrini arzulayıram. Bundan əvvəl iki övladım bu məktəbin yetirməsi olub. Böyük qızım musiqi kollecini bitirib, musiqi müəllimidir. İkinci qızım da 619 bal toplayaraq, qızıl medalla bu məktəbi bitirib. Hazırda xarici dil müəllimidir. Elmira sınaqlarda yüksək nəticələr göstərirdi. Əmindik ki, qəbulda istədiyi balı toplaya biləcək".
Elmira Əliyeva qazandığı uğura görə çox qürurludur. Bu nailiyyəti əldə etməsində valideyn və müəllimlərinin böyük rolu olduğunu bildirir. "Məqsədim gələcəkdə hüquqşünas olmaqdır. Bu yolda inamla addımlayıram. Seçimim isə ya Bakı Dövlət Universiteti və yaxud da Milli Aviasiya Akademiyası olacaq. Arzum gələcəkdə hüquq sahəsində peşəkar mütəxəssis kimi yetişib ölkəmə faydalı, savadlı kadr olmaqdır. Ən çox sevdiyim fənn tarix olub. Bu fənnə sevgini tarix müəllimim aşılayıb. Düşünürəm ki, hansı ixtisası seçməyimizdən, harada işləməyimizdən asılı olmayaraq, tariximizi dərindən öyrənməli, bilməli, daim xatırlamalı və heç vaxt unutmamalıyıq".
Ordubad rayonu üzrə ən yüksək nəticə göstərən Elmira Əliyevanın son sözlərinə qüvvət kimi atalarımızdan miras qalan qiymətli fikirlər yada düşür: Keçmişini unudanın gələcəyi olmaz! Keçmişimizi, tariximizi dərindən öyrənməyə çalışan, onu unutmayan Elmiranın gələcəyinin parlaq olmasını diləyir, ona məqsədləri yolunda uğurlar arzulayırıq!
Bölmənin digər xəbərləri
