Bakı, 10 avqust, AZƏRTAC

Bakı Avropa Liseyi yüksək tədris standartlarına əsaslanan, şagirdlərə yönəlmiş və demokratik prinsiplər üzərində idarə olunan innovativ məktəb kimi ölkəmizdə yüksək imicə malikdir. Liseyin nüfuzu yüksəkrəqabətli qəbul prosesində öz əksini tapıb.

Liseyin əsas missiyası Azərbaycanın intellektual elitasının yetişdirilməsidir.

AZƏRTAC xəbər verir ki, Bakı Avropa Liseyinin öyrədici mühiti istedadlı uşaqların intellektual, yaradıcı və şəxsi potensialının üzə çıxarılmasını, onların fərdi qabiliyyət və istedadlarının inkişafını təmin edir. Bu mühit şagirdlərin yaradıcı axtarışını, qarşıya qoyulmuş məqsədə çatmaq üçün müstəqil və komandada işləmək bacarığını stimullaşdırır. Tənqidi düşüncə və liderlik bacarıqlarının inkişafına çox diqqət yetirilir. Şagirdlərin öz səriştələrini müxtəlif üsullarla nümayiş etdirmələri, məktəbdən kənarda öyrənmə imkanlarının genişləndirilməsi üçün şərait yaradılır.

Hər il liseyin məzunlarının 100 faizi ali məktəblərə yüksək ballarla qəbul olurlar. Bir çox məzunlar Azərbaycanın və dünyanın ən tanınmış universitetlərində təhsil alır və tam təqaüd qazanırlar.

2023-2024-cü tədris ilində Bakı Avropa Liseyini 94 məzun bitirib. Onlardan 19 nəfəri tam orta təhsil pilləsini fərqlənmə attestatı ilə başa vurub,11 məzun isə tam orta təhsili xüsusi nümunəli attestatla, qızıl nişanla bitirib. Məzunların əksəriyyəti dünyanın nüfuzlu universitetlərinə qəbul olub. Qızıl nişanla liseyi bitirən məzunlar da artıq Fransanın Panteon-Assas Universiteti (Université Paris II Panthéon-Assas), İngiltərənin Sausempton Universiteti (University of Southampton), Almaniyanın İnşaat Universiteti (Constructor University), Belçikanın KU Leuven, Türkiyənin KOÇ və ODTÜ, ADA, UNEC və s. universitetlərin tələbələridir. Qeyd etməliyik ki, Səməd Əlizadə Fransanın ən nüfuzlu ali məktəblərindən biri olan Panthéon-Assas Universitetinin ilk azərbaycanlı tələbəsi olub. Bu nailiyyətlər liseyin müəllim, şagird və valideyn birliyinin zəhmətinin bəhrəsidir.

Liseyin məzunları oxuduqları universitetlərdə, həmçinin sonrakı iş fəaliyyətində ölkəmiz də daxil olmaqla xarici ölkələrdə düşünmə, davranış, işə yaradıcı yanaşma, peşəkarlıq, bütün peşə sahələrində nailiyyətlər, yüksək mədəniyyət nümayiş etdirməklə həm təhsil aldıqları Bakı Avropa Liseyinin, həm də Azərbaycanın şərəf və ləyaqətini dünyanın hər bir yerində layiqincə təmsil edirlər, hörmət qazanırlar.