Bakı, 27 may (AZƏRTAC). İsveçin “Eurovision-2012” mahnı müsabiqəsindəki təmsilçisi Lorin yarışmanın finalında səhnəyə 17-ci çıxmışdır.

AZƏRTAC xəbər verir ki, Lorin Bakı səhnəsində ölkəsini “Euphoria” mahnısı ilə təmsil etmişdir.

Əslən Mərakeşdən olan Lorinin əsl adı Lorine Zineb Noka Talhaouidir. O, İsveçin “İdol 2004” müsabiqəsindən sonra populyarlıq qazanmışdır. İlk mahnısını 2005-ci ildə təqdim edən xanım ifaçı bir müddət televiziyada aparıcı olmuşdur.

O, 2011-ci ildə “My Heart is Refusing Me” mahnısı ilə İsveçin milli seçimlərində iştirak etmişdir. İsveçi Avropanın ən nüfuzlu mahnı müsabiqəsində təmsil etmək arzusu isə bu il reallaşmışdır.

“Melodifestivalen” yarışmasında iştirak edən Lorin rekord göstərici ilə qalib elan olunmuşdur. Onun həmin müsabiqədə oxuduğu “Euphoria” mahnısına 4 milyon 670 min tamaşaçı səs vermişdir.