“Pakş-2” layihəsinin həyata keçirilməsi müddəti yenidən uzadılıb
Budapeşt, 23 noyabr, AZƏRTAC
Macarıstanda “Pakş-2” AES-in işə salınması müddətlərinə dair əvvəlki rəsmi bəyanatlara, vədlərə baxmayaraq, hazırda onlar, demək olar, açıq şəkildə “qeyri-mümkün” elan edilib.
AZƏRTAC xəbər verir ki, Macarıstan Milli Atom Energetikası Agentliyinin həftəsonu məlumatında deyilir: “Bu enerji bloklarının hazır olması üçün təqribən daha 10 il vaxt lazımdır. Bu isə o deməkdir ki, onlar yalnız 2029-cu ildə işə salınacaq. Amma enerji bloklarının 2014-cü ildə Rusiya ilə Macarıstan arasında imzalanmış müqaviləyə əsasən istismar müddətini biz artıq bir neçə dəfə dəyişmişik”.
Xatırladaq ki, Rusiya-Macarıstan sazişi imzalanandan sonra Budapeşt layihəni 2023-cü ilə qədər həyata keçirəcəyini vəd edib, amma sonra birinci reaktorun işə salınması müddəti hər dəfə daha gec vaxta keçirilib. Öz ərazisində AES inşa edən Finlandiya da analoji problemlərlə üzləşib.
AZƏRTAC-ın xüsusi müxbirinə bildiriblər ki, enerji blokunun işə salınmasının tezliklə yeni rəsmi tarixi açıqlanacaq. Bununla belə, ekspertlər hələ təqribən bir il əvvəl bildiriblər ki, əgər “Pakş-2”nin tikintisi başlayarsa, birinci enerji blokunun işə salınmasının real tarixi 2032-ci il olacaq.
Pərvanə Qarayeva
AZƏRTAC-ın xüsusi müxbiri
Budapeşt
Bölmənin digər xəbərləri
