Pan-Afrika İqlim Ədaləti Alyansının nümayəndəsi: Qlobal Cənub tarix boyu ədalətsizliyə və istismara məruz qalıb
Bakı, 28 aprel, AZƏRTAC
Qlobal Cənub tarix boyu sistematik ədalətsizliyə və istismara məruz qalıb. Təəssüf ki, iqlim dəyişikliyi bu bərabərsizliyi daha da dərinləşdirib. Beynəlxalq münasibətlər səhnəsində isə Qlobal Cənuba yönəlik xüsusi bir yanaşma, ədalətli bir baxış hələ də tam formalaşmayıb.
AZƏRTAC xəbər verir ki, bu fikirləri Pan-Afrika İqlim Ədaləti Alyansının nümayəndəsi Charles Peter Mwangi Nyambura aprelin 28-də Bakıda keçirilən “Həmrəy fəaliyyət: yeni və ədalətli dünya üçün Qlobal Cənub QHT-lərinin gücləndirilməsi” adlı Forumda çıxışı zamanı səsləndirib.
O qeyd edib ki, Qlobal Cənubun zəngin potensialı davamlı şəkildə istismar olunur. Əksər ölkələr bu bölgənin qarşılaşdığı çətinliklərin fərqindədirlər. Lakin real dəyişiklik üçün atılan addımlar hələ də kifayət etmir.
“İqtisadi və sosial tədbirlərin gücləndirilməsi, eləcə də çoxtərəfli sazişlərin imzalanması və icrası bizim ortaq gələcəyimiz üçün həyati əhəmiyyət daşıyır. Xüsusilə, vətəndaş cəmiyyətlərinin bu sahədə oynadığı rol danılmazdır. Onların fəaliyyəti həm təzyiq mexanizmi yaratmaq, həm də marjinallaşdırılmış icmaların səsinin beynəlxalq səviyyədə eşidilməsinə imkan vermək baxımından böyük önəm daşıyır. Biz, təcrid olunmuş və çətin şəraitdə yaşayan icmaların yanında olmalı, onların haqq səsini ucalda bilmələri üçün dəstək göstərməliyik. Onların təcrübələri, ehtiyacları və çağırışları qlobal siyasət və qərarvermə prosesində əks olunmalıdır”, - deyə forum iştirakçısı bildirib.
Pan-Afrika İqlim Ədaləti Alyansının nümayəndəsi əlavə edib ki, Bakıda keçirilən bu forum isə məhz bu vacib məsələlərin müzakirə edilməsi və birgə həll yollarının axtarılması üçün mühüm bir platformadır. Burada aparılan debatlar və əldə olunacaq nəticələr gələcək üçün istiqamətverici rol oynaya bilər.
Bölmənin digər xəbərləri
