“Paris-2024”də ağırlıqqaldırma idman növü üzrə kvota azaldılıb
Bakı, 8 dekabr, AZƏRTAC
Beynəlxalq Olimpiya Komitəsi (BOK) “Paris-2024”də ağırlıqqaldırma idman növü üzrə kvotanı 120 nəfərə qədər endirməyə qərar verib.
AZƏRTAC xəbər verir ki, bu barədə BOK-un keçirdiyi mətbuat konfransında məlumat verilib.
Bununla yanaşı, medal dəstlərinin sayı 14-dən 10-dək azaldılıb. Belə ki, kişilər və qadınların yarışında 2 çəki dərəcəsi ləğv edilib.
Tokio Olimpiadasında ağırlıqqaldırma idman növü üzrə yarışlarda idmançıların sayı 190 nəfər olacaq.
Xatırladaq ki, ağırlıqqaldırmanın Yay Olimpiya Oyunlarının proqramından çıxarılmasının mümkünlüyü bu növdə dopinq problemləri ilə əlaqədar ortaya çıxıb. 2017-ci ilin dekabrında BOK İcraiyyə Komitəsi ağırlıqqaldırmanın “Paris-2024”ün proqramında qalması üçün əməl olunmalı meyarları açıqlayıb. Beynəlxalq Ağırlıqqaldırma Federasiyasının (IWF) isə təmiz idmana dair müstəqil komissiyanın bütün tövsiyələrini yerinə yetirdiyini bildirib.
Bölmənin digər xəbərləri
