Pedaqoji Universitetdə “Türk odası”nın yaradılmasının 15 illiyi qeyd olunub
Bakı, 24 aprel, AZƏRTAC
Aprelin 24-də Azərbaycan Dövlət Pedaqoji Universitetində (ADPU) “Türk odası”nın yaradılmasının 15 illiyinə həsr olunan tədbir keçirilib. Mərasimdən öncə ADPU-nun rektoru, professor Cəfər Cəfərov iştirakçılarla görüşüb.
Sonra tədbir iştirakçıları “Türk odası”nın, Türk Araşdırmaları Elmi-Tədqiqat Mərkəzinin, TÜRKSOY kafedrasının fəaliyyəti ilə tanış olublar.
AZƏRTAC xəbər verir ki, ADPU-nun Heydər Əliyev məktəbinin lektoriyasında keçirilən tədbirdə rektor Cəfər Cəfərov universitetdə “Türk odası”nın yaradılmasının 15 illiyinin qeyd edilməsini ali məktəbin həyatında əlamətdar hadisə kimi dəyərləndirib. Vurğulayıb ki, Türkiyənin Azərbaycandakı səfiri Erkan Özoral ADPU-ya qardaş ölkə ilə təhsil sahəsində əlaqələrin genişləndirilməsində böyük dəstək verir. Bu dəstək, həmçinin “Türk odası”nın fəaliyyətində öz əksini tapır.
Rektor bildirib ki, “Türk odası” ADPU-da 2004-cü ildə Türkiyə səfirliyi tərəfindən yaradılıb. Bu, ADPU-nun fəaliyyəti dövründə universitetdə təşkil olunmuş ilk beynəlxalq qurumdur. Onun yaradılmasını zəruri edən başlıca səbəb ADPU-da müstəqillik dövründə türk xalqları ədəbiyyatı və mədəniyyətinin geniş şəkildə araşdırılması, tədrisi və təbliği sahəsində əldə olunmuş nailiyyətlərlə bağlıdır. Belə ki, 1996-cı ildən sonra Azərbaycan universitetlərinin filologiya fakültələrində tədris planlarına yeni salınmış “Türk xalqları ədəbiyyatı” fənninin tədris proqramı, dərs vəsaiti və dərsliklərinin yazılmasında ADPU-nun göstərdiyi nəticələr digər ali məktəblərlə müqayisədə daha yüksək olub. Qürur hissi ilə qeyd etmək lazımdır ki, ADPU o zaman türk dünyası ədəbiyyatı və mədəniyyəti problemlərinin araşdırılmasında elmi mərkəzə çevrilmişdi. İndi olduğu kimi, həmin dövrdə də əksər universitetlərdə “Türk xalqları ədəbiyyatı” fənninin tədrisi ADPU-nun tədris proqramı, dərs vəsaiti və dərsliklərinə uyğun aparılırdı. Təbii ki, daha böyük uğurlar qazanmaq üçün türk xalqları ədəbiyyatı, geniş mənada isə türk mədəniyyətinin təbliği ilə bağlı universitetdə yeni bir qurumun yaranmasına ehtiyac var idi. Bu məqsədlə professor Elman Quliyevin ADPU-da “Türk odası” adlı qurumun yaradılması üçün Türkiyənin Azərbaycandakı səfirliyinə müraciəti nəticəsiz qalmadı. Qısa zaman ərzində ADPU-da “Türk odası” fəaliyyətə başladı və onun bütün maddi-texniki təchizatı Türkiyə səfirliyi tərəfindən təmin edildi. “Türk odası”nın fəaliyyət proqramı hazırlanarkən türkçülüyün, Türkiyə ədəbiyyatı və mədəniyyətinin, türk dünyası ədəbiyyatı və mədəniyyətinin təbliği istiqamətləri hədəf kimi planlaşdırıldı.
Professor Cəfər Cəfərov vurğulayıb ki, “Türk odası”nın fəaliyyətinin səmərəsini artırmaq üçün, ilk növbədə, türkdilli dövlətlərin bir sıra elmi-mədəni qurumları, universitetləri, ictimai birlikləri və s. ilə əlaqələr quruldu. Bu gün “Türk odası” Türkiyənin Hacettepe, Uludağ, Orxon Qazi, Məhməd Akif Ərsoy, Ege və digər nüfuzlu universitetləri ilə sıx əməkdaşlıq edir. Eyni zamanda, Türk Ocaqlar Birliyi, Türk Dil Qurumu, TÜRKSOY, TİKA ilə yaradılmış əlaqələr “Türk odası”nın qarşıya qoyduğu məqsədlərə çatmasına kömək edir. Həmin qurumlar tərəfindən təşkil olunmuş beynəlxalq konfranslara “Türk odası”nın dəvət edilməsi həm odanın, həm də universitetimizin yeni imic qazanmasına, beynəlxalq nüfuzunun artmasına və beynəlxalq aləmdə tanınmasına mühüm təsir göstərib. Türkiyə, Şimali Kipr, Türkmənistan, Qırğızıstan, Qazaxıstan və başqa türk dövlətlərində təşkil olunmuş elmi-kütləvi tədbirlərdə “Türk odası”nın müntəzəm iştirakı həmin ölkələrdə bu quruma olan diqqət və marağı artırıb. Hazırda “Türk odası” bu ölkələrdə elmi və mədəni qurum kimi tanınır. Qeyd etmək lazımdır ki, Türkiyə səfirliyi və TİKA-nın “Türk odası”na xüsusi qayğısı var. Belə ki, 2004, 2007 və 2016-cı illərdə Türkiyə səfirliyi və TİKA-nın birgə təşəbbüsü ilə “Türk odası”nın texniki avadanlıqla təchiz edilməsi hər iki qurumun, bütünlükdə isə Türkiyə dövlətinin ADPU-ya və onun nəzdində fəaliyyət göstərən “Türk odası”na olan diqqət və marağının təzahürüdür.
“Türk odası”nda zəngin kitabxana yaradılıb. Türkiyənin Azərbaycandakı səfirliyi, Türkiyənin Mədəniyyət Nazirliyi və TİKA-nın birgə layihələri əsasında 2004-cü ildə 1000 kitabın, 2007-ci ildə 500, 2018-ci ildə 350 kitabın “Türk odası”na pulsuz hədiyyə edilməsi “Türk odası” kitabxanasının zənginləşməsinə səbəb olub. “Türk odası” həmin kitabların daha geniş istifadəsini təmin etmək məqsədilə kitabların böyük əksəriyyətini ADPU-nun Kitabxana-İnformasiya Mərkəzinə təqdim edib. “Türk odası” ADPU-da təhsil alan türkiyəli tələbələrlə də əlaqə saxlayır, həmçinin bir sıra tədbirlərin keçirilməsində onlarla birgə iş aparılır.
Türkiyənin Azərbaycandakı səfiri Erkan Özoral qeyd edib ki, Azərbaycan dövlət müstəqilliyini bərpa etdikdən sonra Türkiyə ilə bütün sahələrdə geniş əlaqələr qurub. Bu əlaqələr elm, təhsil və mədəniyyət sahəsində daha sürətlə inkişaf edib. Böyük Mustafa Kamal Atatürk “Azərbaycanın sevinci sevincimiz, kədəri kədərimizdir” deyib. Ulu öndər Heydər Əliyev isə “Biz bir millət, iki dövlətik” söyləyib. ADPU-da “Türk odası”nın fəaliyyət göstərməsi təqdirəlayiqdir. Bizim belə qurumlara ehtiyacımız var. Belə qurumlar bizim elm, təhsil və mədəniyyət sahəsindəki əlaqələrimizə böyük dəstək verir.
Professor Elman Quliyev “Türk odası”nın 15 ildəki fəaliyyəti haqqında hesabat məruzəsi ilə çıxış edib. O, “Türk odası”nın perspektivlərindən, daha böyük uğurlar qazanmaq naminə yeni layihələr üzərində iş aparıldığından danışıb. “Türk odası”nın bundan sonra da səmərəli fəaliyyəti ilə seçiləcəyinə və ADPU-nun şöhrətini daha da artıracağına ümidvar olduğunu bildirib.
Tədbirdə “Türk odası” ilə bağlı slaydlar təqdim edilib.
Bölmənin digər xəbərləri
