Pekinin ABŞ-la xarici ticarətinin həcmi beş ayda 32,6 faiz azalıb
Bakı, 4 iyul, AZƏRTAC
Çin paytaxtının ABŞ-la xarici ticarətinin həcmi bu ilin ilk beş ayı ərzində 32,6 faiz - 72,33 milyard yuan (təxminən 10,52 milyard dollar) azalıb.
AZƏRTAC “China Daily” qəzetinə istinadla xəbər verir ki, bu barədə Pekinin Gömrük İdarəsi məlumat yayıb.
Məlumata əsasən, Pekinin bu ilin yanvar-may aylarında digər ölkələr və dünya regionları ilə xarici ticarət həcmi 7,5 faiz artaraq 1,15 trilyon yuan (təxminən 167 milyard dollar) təşkil edib. Bununla yanaşı, şəhərin ümumi idxal həcmi 8,9 faiz artaraq 955,56 milyard yuana (138,89 milyard dollar) bərabər olub, ixrac həcmi isə 198,94 milyard yuana (28,92 milyard dollar) çatıb ki, bu da ötən ilin analoji dövrü ilə müqayisədə 1,4 faiz çoxdur.
Birləşmiş Ştatlarla ticarətdə mənfi tendensiyaya baxmayaraq, Pekinin Avropa İttifaqı ilə əmtəə dövriyyəsi yanvar-may aylarında 22,1 faiz artıb və 156,53 milyard yuan (22,75 milyard dollar) təşkil edib. Çin paytaxtının Cənub-Şərqi Asiya Dövlətləri Assosiasiyası ilə ticarət həcmi həmin dövr ərzində 2,1 faiz - 103,06 milyard yuan (15,05 milyard dollar), Avstraliya ilə ticarət həcmi isə 61,7 faiz - 84,94 milyard yuan (12,35 milyard dollar) artıb.
Bölmənin digər xəbərləri
