Pianoçu İslam Manafov: Ölkəmizin irsini və mədəniyyətini təbliğ etmək hər bir azərbaycanlının borcudur
Ankara, 23 may, AZƏRTAC
Ölkəmizin irsini və mədəniyyətini təbliğ etmək hər bir azərbaycanlının borcudur.
Bu sözləri AZƏRTAC-a müsahibəsində Azərbaycan Xalq Cümhuriyyətinin (AXC) elan edilməsinin 107-ci ildönümü münasibətilə mayın 25-də Ankarada konsertlə çıxış edəcək Azərbaycanın Əməkdar artisti, tanınmış pianoçu İslam Manafov deyib.
Onun sözlərinə görə, Azərbaycan tarixində may ayı bir çox görkəmli dövlət xadimlərinin nailiyyətləri və adları ilə bağlıdır. “Xalqımıza bunun gələcəkdə də belə davam etməsini səmimi-qəlbdən arzulayıram”, - deyən pianoçu iki həftə əvvəl Türkiyənin Düzcə vilayətində konsert verdiyini və burada çıxışını Ümummilli Lider Heydər Əliyevin xatirəsinə həsr etdiyini bildirib.
Virtuoz pianoçu bildirib ki, hazırkı proqramı hazırlayarkən dünyaşöhrətli bir çox tanınmış mədəniyyət xadimlərinin çıxış etdiyi Ankaradakı Türkiyənin Prezident Simfonik Orkestrinin tarixi səhnəsini seçib.
O bildirib ki, türk musiqisevərlərinin diqqətinə təkcə klassik əsərlər deyil, caz kompozisiyaları da təqdim olunacaq. Pianoçu sözlərinə yekun vurub: “Xarici bəstəkarların əsərləri ilə yanaşı, 140 illik yubileyi Azərbaycanın hüdudlarından çox-çox uzaqlarda da geniş qeyd olunan dahi Üzeyir Hacıbəylinin “Cəngi” əsərini konsertin repertuarına daxil etdim. Ankarada yaşayan azərbaycanlıları, ümumiyyətlə, musiqini sevən hər kəsi konsert zalında görməyə şad olaram”.
AZƏRTAC-ın xüsusi müxbiri
Ankara
Bölmənin digər xəbərləri
