Bakı, 17 fevral, AZƏRTAC

Prezident İlham Əliyevin Davosda Çinin CGTN (China Global Television Network) telekanalına müsahibəsi təkcə ölkəmizdə deyil, dünyada maraqla izlənildi. Dövlətimizin başçısı Azərbaycanın beynəlxalq aləmdəki mövqeyi, eyni zamanda, ölkəmizin sosial inkişafı, iqtisadi təhlükəsizliyi haqqında dolğun məlumat verdi. Prezident İlham Əliyev müstəqillik tariximizin ən mühüm nailiyyəti olan ərazi bütövlüyümüzün və suverenliyimizin tam bərpasından danışaraq qeyd etdi ki, biz işğal altında olan tarixi ərazilərimizi beynəlxalq hüququn norma və prinsiplərinə əsaslanaraq azad etdik. Bu tarixi qələbə 30 il ərzində milli ideyamız və hədəfimiz idi. Təəssüf ki, ədaləti bərpa etməyi öhdəsinə götürmüş beynəlxalq güclərin fəaliyyətsizliyi ilə qəbul edilmiş qətnamələr kağız üzərində qalmışdı. Belə olduğu təqdirdə Ermənistan tərəfindən işğal olunmuş ərazilərimizi özümüz azad edərək ərazi bütövlüyümüzü tam təmin etməyi bacardıq. Prezident haqlı olaraq bildirdi ki, indi dünyanın beynəlxalq öhdəliklərə tam hörmət edilməsinə ehtiyacı var.

AZƏRTAC xəbər verir ki, bu fikirlər Naxçıvan MR Ali Məclisinin deputatı Xumar Məmmədovanın açıqlamasında yer alıb.

Bununla yanaşı, mövcud vəziyyətdə Azərbaycan və Çin münasibətlərinə toxunan dövlət başçısı vurğuladı ki, ölkələrimiz rəsmi olaraq strateji tərəfdaşdırlar. Ölkəmiz dünyanın iqtisadi nəhənglərindən olan Çin Xalq Respublikası ilə əlaqələrin daha da möhkəmlənməsinə böyük önəm verir. Azərbaycan bu ölkə ilə əməkdaşlığın genişləndirilməsində maraqlıdır. Əlaqələrimiz çoxşaxəli və sağlam təməllər üzərində qurulub.

Prezident ABŞ ilə münasibətlərindən söhbət açaraq qeyd etdi ki, ölkələrimiz arasında yeni dövrün başlanması hər iki tərəfin marağındadır. Geridə qoyduğumuz son 4 ildə Bayden administrasiyasının Azərbaycana ədalətsiz yanaşmasının əlaqələrimizin korlanması ilə nəticələndiyini vurğulayan Prezident söylədi ki, Trampla birgə işləməklə bağlı əvvəlki təcrübəmiz müsbət olub. Məhz bu baxımdan Prezident ABŞ-Azərbaycan münasibətlərində yeni dövrün başlanmasının anonsunu verdi.

Bundan əlavə, Prezident İlham Əliyev müsahibəsində ötən il ölkəmizdə uğurla keçirilən iqlim sammiti ilə bağlı bəzi məsələlərə toxundu. Dövlət başçısının qeyd etdiyi kimi, Azərbaycanın dünya ölkələrinin yekdil dəstəyi ilə COP29-a sədrliyi üzərinə götürməsi ölkəmizə göstərilən etimadın nümunəsi idi. Bu, bir həqiqətdir ki, COP29-un Azərbaycanda keçirilməsi Prezident İlham Əliyevin rəhbərliyi ilə ölkəmizin milli və beynəlxalq səviyyədə apardığı siyasətin nəticəsi kimi tarixə qovuşdu.

COP29-dan söz düşmüşkən, müsahibədə bu məsələ ilə bağlı toxunulan bir məqama diqqət yetirmək istərdim. Dünyanın siyasi və iqtisadi xəritəsində yüksək yer tutmasını hədəf seçən Azərbaycanın bu məqsəd uğrunda qətiyyətli addımlar atdığını vurğulayan Prezident İlham Əliyev qeyd edib ki, təxminən, 200 ölkəni bir araya gətirən iqlim konfransına ev sahibliyi etmək böyük çağırış, böyük məsuliyyət, eyni zamanda, böyük nailiyyət idi. Azərbaycanın şaxələnmiş xarici siyasətinin daha bir nümayişi ondan ibarət idi ki, bizim namizədliyimiz bütün iştirakçı dövlətlər və qurumlar tərəfindən müdafiə olundu: “Təqribən 200 ölkə və beynəlxalq təşkilat Azərbaycanın namizədliyini yekdilliklə dəstəklədi. Bundan əvvəl biz 120 ölkəni birləşdirən, BMT Baş Assambleyasından sonra ikinci böyük beynəlxalq təsisat olan Qoşulmama Hərəkatına 4 il ərzində uğurla sədrlik etdik. Bu onu göstərir ki, bizim dostluğa, əməkdaşlığa, heç bir ölkənin daxili işlərinə qarışmamağa əsaslanan siyasətimiz həqiqətən də beynəlxalq arenada dəstəklənir. Ona görə də biz belə qlobal, beynəlxalq bir tədbirə ev sahibliyi edə bilərik”.

Azərbaycan lideri müsahibədə iqlim dəyişikliyindən bir çox ölkələrin, o cümlədən respublikamızın əziyyət çəkdiyini, hətta kiçik ada dövlətlərinin mövcudluğuna təhlükə yarandığını və bəzən bununla bağlı onların məsələsinin gündəliyə daxil edilmədiyini təəssüflə diqqətə çatdırıb. Qeyd edib ki, Bakıda keçirilən COP29-da ən mühüm tədbirlərdən biri inkişaf etməkdə olan kiçik ada dövlətlərinin Zirvə görüşü idi. Orada Azərbaycan bu ölkələrə əməli dəstək göstərmək üçün çox iddialı gündəlik irəli sürdü. “Aydın məsələdir ki, böyük aktorların birgə yanaşması olmadan həmin ölkələri və iqlim məsələləri ilə məşğul olmaq üçün maddi ehtiyatları olmayan ölkələri dəstəkləmək çətin olacaq. Düşünürəm ki, üzərinə bu yükü götürən ölkələrin məsuliyyəti daha çox iş görməkdir”,– deyə dövlətimizin başçısı bildirib.

“Beləliklə, göründüyü kimi, dövlətimizin başçısının CGTN telekanalına müsahibəsi mühüm mesajlarla yadda qaldı. Bütün dünya ilə normal münasibətlər quraraq Azərbaycanın milli maraqlarını tam təmin edən Prezident İlham Əliyev 20 ildən artıq müddət ərzində Azərbaycan xalqına müsbət və ya mənfi olmasına baxmayaraq hər zaman həqiqəti söyləyib. Məhz bu üstün keyfiyyətlər inkişafın, sabitliyin, təhlükəsiz həyatımızın təminatçısı olan Azərbaycan liderinə ümumxalq sevgisi qazandırıb. Etibarlı tərəfdaş olduğunu fəaliyyəti ilə sübut edən Azərbaycanın özü ən etibarlı əldədir”, - deyə deputat qeyd edib.