Prezident İlham Əliyev beynəlxalq səviyyədə səmərəli fəaliyyəti ilə Türk dünyasının birliyi ideyasını reallığa çevirir - RƏY
Bakı, 6 noyabr, AZƏRTAC
Dünyada mötəbər qurum kimi tanınan Türk Dövlətləri Təşkilatının (TDT) nüfuzu və təsir dairəsi getdikcə artır. 2009-cu ildə Naxçıvan Zirvə görüşündən ötən müddət ərzində uğurlu inkişaf yolu keçən qurumun üzv ölkələrinin sıx əməkdaşlığı diqqət çəkir. Türk dövlətlərinin birliyi və həmrəyliyi istiqamətində müxtəlif sahələrdə əməkdaşlıq əlaqələri genişləndirilir.
Bu sözləri AZƏRTAC-a açıqlamasında Milli Məclisin deputatı Məşhur Məmmədov deyib.
Türk dünyasının 200 milyondan çox insanın yaşadığı geniş bir ərazini əhatə etdiyini diqqətə çatdıran deputat TDT-na üzv olan ölkələrin yerləşdiyi coğrafi mövqenin əhəmiyyətini qeyd edib. O, Orta Dəhlizin imkanları ilə əlaqədar bildirib ki, Qərbin qovuşuğunda yerləşən Azərbaycan bu marşrutda həlledici rol oynayır.
“Türkçülük, Türk dövlətlərinin birliyi, Türk dünyasının güclənməsi ideyası hazırda çox aktualdır. Azərbaycan Prezidenti İlham Əliyev beynəlxalq səviyyədə səmərəli və real fəaliyyəti ilə bu ideyanı reallığa çevirir. Dövlətimizin başçısının məqsədyönlü siyasəti nəticəsində Azərbaycanın TDT-yə üzv ölkələrlə həm təşkilat daxilində, həm də ikitərəfli istiqamətdə sıx əlaqələri var. Üzv ölkələrin rəhbərlərinin qarşılıqlı səfərləri, imzalanan sənədlər, beynəlxalq müstəvidə bir-birini dəstəkləməsi bu təşkilatın inkişaf perspektivlərini müəyyən edən əsas amillərdəndir”, - deyə deputat vurğulayıb.
Türk dövlətləri ilə münasibətlərin möhkəmləndirilməsinin Azərbaycanın xarici siyasətinin əsas prioritetlərindən biri olduğunu diqqətə çatdıran M.Məmmədov deyib: “Türk Dövlətləri Təşkilatının məqsədi Türk dünyasının inkişafına nail olmaq, dünyada mövcud geoiqtisadi və geosiyasi böhran fonunda gücləri birləşdirmək, daha sıx əməkdaşlıq münasibətləri qurmaqdır. Azərbaycan və Türkiyə aparıcı ölkələr olaraq bu prosesdə fəal rol oynayırlar. Təsadüfi deyil ki, Azərbaycan Prezidenti son iki ildə Türk Dövlətləri Təşkilatına üzv və müşahidəçi dövlətlərə 20, “Türk Əsri” çağırışı altında TDT-nın 10-cu Zirvə görüşünə ev sahibliyi edən Qazaxıstana 3 dəfə səfər edib. Astana Zirvə Görüşündə çıxış edən Prezident İlham Əliyev bir sıra mühüm məqamlara toxundu. Naxçıvan Zirvə görüşündən ötən müddət ərzində müxtəlif sahələrdə əməkdaşlıq əlaqələrinin artmasından məmnunluğunu ifadə edən dövlətimizin başçısı Azərbaycan ilə Ermənistan arasında münasibətlərdən də danışdı. Ölkəmizin suverenliyinin və ərazi bütövlüyünün hər şeydən üstün olduğu bir daha beynəlxalq tribunadan bəyan edildi”, - deyə M.Məmmədov bildirib.
Dövlətimizin başçısının vurğuladığı kimi, Türk dünyası böyük bir ailədir. Azərbaycan Prezidenti türk dövlətlərin inəməkdaşlığını və birliyini belə izah edir: “Biz bir-birimizin milli maraqlarını nəzərə alaraq, biz bundan sonra da qarşılıqlı dəstək və həmrəylik nümayiş etdirməliyik. Siyasi, iqtisadi, ticarət, mədəniyyət, nəqliyyat, enerji, kənd təsərrüfatı və turizm, o cümlədən rəqəmsal transformasiya ilə yanaşı, biz təhlükəsizlik, müdafiə və müdafiə sənayesi kimi sahələrdə də əməkdaşlığı intensivləşdirməliyik”.
“Zirvə görüşü TDT-nın bundan sonrakı yol xəritəsini müəyyənləşdirdi və dünya gücləri ilə bərabər şəraitdə əməkdaşlıq edəcəyini ortaya qoydu. Sammitdə 12 sənədin imzalanması da bunu təsdiqləyir. Onların sırasında ən mühüm sənədlərdən biri 2023-2027-ci illər üçün nəqliyyat kommunikasiyalarının inkişafına dair Birgə Fəaliyyət Planıdır. Türk Dövlətləri Təşkilatının “Türk Əsri” çağırışı altında keçirilən 10-cu Zirvə görüşü digər üzv dövlətlər arasında əlaqələrin daha da möhkəmləndirilməsi və yeni əməkdaşlıq istiqamətlərinin müəyyənləşdirilməsi baxımından mühüm tədbirdir”, - deyə Məşhur Məmmədov fikirlərini yekunlaşdırıb.
Bölmənin digər xəbərləri
