Bakı, 2 avqust, AZƏRTAC

Azərbaycan dövləti birinci şəxs səviyyəsində ilk gündən bəyan edib ki, Qarabağda yaşayan ermənilərin hüquq və təhlükəsizliyi ən yüksək səviyyədə qorunacaq və təmin olunacaq.

İkinci Qarabağ müharibəsi Xankəndidə və ətraf ərazilərdə yaşayan ermənilərə öz müqəddəratını müəyyən etmək üçün ən böyük şans idi - ya Azərbaycanın vətəndaşları olaraq bu dövlətin tərkibində yaşamaq, yaxud öz taleyini başqa yerdə müəyyən etmək. Dövlətin içində ikinci dövlət yaratmaq xülyası artıq keçmişdə qaldı. Təəssüf ki, Qarabağda separatçıların tör-töküntüləri orada yaşayan əhalini bu cür yanlış yönə istiqamətləndirirlər. Lakin 2020-ci il Vətən müharibəsindən sonra Azərbaycan dövlətinin humanizmi, məsələləri sivil yolla həll etmək səyləri, Qarabağ ermənilərini dəfələrlə danışıqlara dəvət etməsi ölkəmizin bu məsələdə ümumbəşəri prinsiplərdən çıxış etməsindən xəbər verir.

Bu fikirləri AZƏRTAC-a açıqlamasında Azərbaycan-Amerika Gəncləri İctimai Birliyinin sədri Vüqar Əhmədov söyləyib.

QHT sədri bildirib ki, dövlətimizin başçısının “Euronews” televiziyasına müsahibəsində qeyd etdiyi kimi, Qarabağda yaşayan erməni əsilli Azərbaycan vətəndaşları hansısa qondarma və özlərini “parlamentari”, “nazir” elan etmiş şəxslərin sözü ilə oturub dursalar, onların aqibətləri daha acınacaqlı olacaq. Çünki bu şəxslərin artıq Azərbaycan daxilində heç bir səlahiyyəti yoxdur, onlar çox yaxşı bilirlər ki, onları nə Ermənistanda, nə Azərbaycanda qəbul etməyəcəklər. Ona görə belə cəhdlərlə özlərini qorumağa və insanlardan girov kimi istifadə etməyə çalışırlar.

“Azərbaycan separatizmlə hər zaman ən sərt şəkildə mübarizə aparıb və biz bunu ən yaxın tariximizdən, 1993-cü ildən yaxşı xatırlayırıq. Əgər hələ o zamanlar Heydər Əliyevin qətiyyəti olmasaydı, indi Azərbaycan bir neçə vilayətə bölünmüşdü. Azərbaycan dövləti isə öz siyasəti ilə hər zaman vahid dövlətçilik prinsipindən çıxış edir. Dövlətimizin bütün milli və etnik azlıqlara kimliklərini, mədəniyyətlərini, tarixini və dilini yaşatmaq üçün şərait yaratdığının şahidiyik. Azərbaycanın uzun illərdir həyata keçirdiyi multikulturalizm siyasəti və tolerantlıq mühiti müxtəlif xalqların ölkə ərazisində sülh və anlaşma şəraitində yaşamasına dəstək olub. Lakin indiki dövrdə isə Qarabağa gedən insanlar Ermənistan və ya hansısa üçüncü ölkə vətəndaşları olaraq dünya birliyi tərəfindən Azərbaycan ərazisi kimi tanınan ərazilərə qanunsuz şəkildə daxil olurdular. Bu, beynəlxalq hüququn bütün normalarının kobud şəkildə pozulması deməkdir”, - deyə V.Əhmədov diqqətə çatdırıb.

Azərbaycanın Vətən müharibəsini başlatmaqda əsas məqsədinin legitim ərazilərimizi işğaldan azad etməklə yanaşı, dövlətimizin bütövlüyünü qorumaq və separatizmin kökünü kəsmək olduğunu deyən V.Əhmədov vurğulayıb: “Biz görürük ki, bu gün bütün dünyada, Qərb ölkələrində separatizmlə ən sərt şəkildə mübarizə aparılır. Hətta özünü demokratiyanın mərkəzi adlandıran Fransa kimi bir ölkədə, Korsikada yaşayan azlıqlara öz dillərində təhsil almaq üçün şans verilmir. Azərbaycan isə separatizmin kökünü kəsmək üçün qarşısında maneə kimi dayanan sivil əhalinin aqibətini nəzərə alaraq Qarabağda yaşayan insanlar üçün humanitar dəhliz yaradıb. Qarabağda, hazırda müvəqqəti olaraq Rusiya sülhməramlılarının nəzarəti altında olan ərazidə yaşayan insanlar Azərbaycanın ərazisində olduqlarını unutmamalıdırlar. Onların gələcək təhlükəsizliyini yalnız Azərbaycan dövləti təmin edə bilər. Bu reallığı artıq Ermənistan hökuməti də qəbul edib”.

QHT sədrinin sözlərinə görə, əgər bu gün qərəzli dairələr tərəfindən səsləndirildiyi kimi, Azərbaycanın Qarabağda etnik təmizləmə siyasəti aparmaq fikri olsaydı, bunu indi deyil, Vətən müharibəsinin ilk günlərindən edərdi. Ona görə indi ermənilər tərəfindən səsləndirilən belə bəyanatların heç bir əsası yoxdur.

“Əksinə, bu gün Qarabağda yaşayan ermənilər ölkəmizdəki tolerant və multikultural mühitdən yararlanmalı, inteqrasiya etməlidirlər. Digər xalqlar və millətlər kimi, Qarabağ ermənilərinin də mədəniyyət, din və təhsil hüquqları təmin olunacaq, Azərbaycanın qoşulduğu beynəlxalq təşkilatların milli və etnik azlıqların hüquqlarına dair konvensiyalar onlara da şamil ediləcək. Bununla onlar Azərbaycanın tamhüquqlu vətəndaş olmaq imkanı qazanacaqlar. Təbii ki, bu gün Qarabağda yaşayan erməni əhalisi üçün həlledici bir məqamdır və onlar Azərbaycan dövləti daxilində daha çox inteqrasiya etməklə həm də Ermənistanla Azərbaycan arasında normallaşma prosesinə öz töhfələrini vermiş olarlar”, - deyə o fikirlərini yekunlaşdırıb.