Bakı, 29 oktyabr, AZƏRTAC

Prezident İlham Əliyev Gürcüstana işgüzar səfəri zamanı bu ölkənin Baş naziri İrakli Qaribaşvili ilə iki dövlət arasında bir çox sahələrdə mövcud dostluq əlaqələrinin daha da inkişaf etdirilməsi barədə müzakirələr apardı. Bu gün Azərbaycan ilə Gürcüstan arasında əməkdaşlıq müsbət dinamika ilə inkişaf edir və Prezident İlham Əliyevin Gürcüstana səfəri iki ölkə arasında dostluq, qardaşlıq münasibətlərinə böyük təkan verəcək.

AZƏRTAC xəbər verir ki, bunu Milli Məclisin deputatı, professor Kamilə Əliyeva deyib.

O bildirib ki, görüşdən sonra Prezident İlham Əliyev mətbuata bəyanatında Gürcüstan ilə Azərbaycan arasında yaxın vaxtlarda siyasi, iqtisadi əlaqələrin daha da dərinləşəcəyi, Cənubi Qafqazda sülhün bərqərar olmasında ölkəmizin mövqeyi, Azərbaycanın Ermənistanla sülh müqaviləsinin bağlanmasına önəm verməsi, eləcə də respublikamızın Gürcüstan da daxil olmaqla Avropanın enerji təhlükəsizliyində oynadığı əhəmiyyətli rolu barədə məlumat verib.

“Tarix boyu Azərbaycan və gürcü xalqları hər zaman dostluq, qardaşlıq, mehriban qonşuluq şəraitində yaşamışlar. İki ölkə arasında çox isti münasibətlər mövcud olub. Bu ənənə bu gün də davam etdirilir. Bu gün Azərbaycanla Gürcüstan arasında strateji tərəfdaşlıq əlaqələri müttəfiqlik səviyyəsinə yüksəlib. Bütün beynəlxalq təşkilatlarda hər iki dövlət bir-birini dəstəkləyir. Azərbaycan və Gürcüstanın birgə icra etdiyi layihələr region dövlətləri ilə yanaşı Avropa ölkələri üçün də böyük əhəmiyyət daşıyır.

Azərbaycan hər zaman Cənubi Qafqazda sülhün, əmin-amanlığın bərqərar olması üçün böyük səy göstərir. Müharibə bitdikdən sonra Azərbaycanla Ermənistan arasında sülh müqaviləsinin bağlanması üçün ölkəmiz 5 əsas prinsipdən ibarət təklif irəli sürüb. Ermənistan tərəfi bu təklifləri qəbul edərsə, Cənubi Qafqazda tezliklə sülh bərqərar olar. Prezident İlham Əliyev Gürcüstanda Ermənistana daha bir xoşniyyətli təklif irəli sürüb. Dövlətimizin başçısı Ermənistan rəhbərliyinə Azərbaycan-Gürcüstan-Ermənistan məsləhətləşmələrinə başlamağa hazırdırsa, ölkəmizin də buna hazır olduğu mesajını verdi”, - deyə K.Əliyeva vurğulayıb.

Azərbaycanla Gürcüstan arasında iqtisadi-ticari əlaqələrin də yüksələn xətlə inkişaf etdiyini diqqətə çatdıran deputat deyib: “İki dövlət arasında cari ilin 9 ayı ərzində qarşılıqlı ticarət dövriyyəsi bir milyard dollara yaxınlaşıb. Azərbaycan Gürcüstanın iqtisadiyyatına 3 milyard dollar vəsait yatırıb ki, bu da hər iki dövlətin maraqlarına cavab verir. Azərbaycan Avropanın enerji təhlükəsizliyində də mühüm rol oynayır. Cənub Qaz Dəhlizi vasitəsilə Azərbaycandan Avropaya təbii qaz ixracının həcmi hər il artırılır. Bir çox sahələrdə, eləcə də enerji sahəsində Azərbaycan Avropa İttifaqı ilə sıx əməkdaşlıq edir. Bu ilin iyul ayında Avropa Komissiyası ilə Azərbaycan arasında imzalanmış enerji sahəsində tərəfdaşlığa dair Memoranduma əsasən 2027-ci ildə Azərbaycandan təkcə Avropaya qaz ixracı 20 milyard kubmetrə çatdırılacaq. Azərbaycan, eyni zamanda, dünyaya elektrik enerjisi ixrac etməyi də planlaşdırır. Bu sahədə ölkəmizdə böyük layihələr həyata keçirilib. Azərbaycan elektrik enerjisi istehsalı və ixracı sahəsində də Gürcüstanla əməkdaşlığa böyük önəm verir. Bakı-Tbilisi-Qars dəmir yolu xətti ilə yükdaşımaların həcmi hər il artmaqdadır. Bu marşrut xətti ilə yükdaşımaların həcmini daha da artırmaq üçün Azərbaycan dövləti bu layihəyə əlavə sərmayə qoyacaq”.

Deputatın sözlərinə görə, dünyanın və Avropanın enerji resurslarına böyük tələbatının olduğunu nəzərə alaraq Azərbaycanla Gürcüstanın bu sahədə birgə fəaliyyəti hər iki dövlətin milli maraqlarına cavab verir.