Türkiyə-Azərbaycan Universitetinin yaradılmasının 1 ili tamam olur

Bakı, 19 fevral, Xatirə Cəfərova, AZƏRTAC

Bu gün Orta Doğu Texniki Universiteti, İstanbul Texniki Universiteti, Hacettepe Universiteti və Azərbaycan Texniki Universitetinin tərəfdaşlığı ilə fəaliyyətə başlayan Türkiyə Azərbaycan Universitetinin (TAU) yaradılmasının 1 ili tamam olur. “Azərbaycan Respublikasının Elm və Təhsil Nazirliyi ilə Türkiyə Respublikasının Ali Təhsil Şurası arasında Türkiyə-Azərbaycan Universitetinin (TAU) yaradılmasına dair Anlaşma Memorandumu” 2024-cü il fevralın 19-da Ankara şəhərində imzalanıb. Bu münasibətlə Türkiyə-Azərbaycan Universitetinin prorektoru Mehmet Şimşir AZƏRTAC-a müsahibəsində TAU-nun məqsədi və tədris prosesi ilə bağlı müsahibə verib. Müsahibəni təqdim edirik.

- Türkiyə-Azərbaycan Universitetini Azərbaycan təhsil sistemində fərqləndirən xüsusiyyətlər hansılardır?

- Türkiyə-Azərbaycan Universiteti digər sahələrdə olduğu kimi təhsil sahəsini də ən yüksək səviyyəyə çatdırmaq məqsədilə hər iki ölkənin dövlət başçılarının ortaq konsensusundan yaranmış universitetdir. Türkiyə-Azərbaycan Universiteti model olaraq digər universitetlərdən çox fərqli bir quruluşa malikdir. Türkiyə-Azərbaycan Universiteti “çətir universitet” funksiyasını yerinə yetirir. Belə ki, bu ali təhsil müəssisəsi Türkiyənin 3 (Orta Doğu Texniki Universiteti, İstanbul Texniki Universiteti, Hacettepe Universiteti), Azərbaycanın bir (Azərbaycan Texniki Universitetinin) universitetinin tərəfdaşlığı ilə qurulub. Bu mənada biz mahiyyətcə ortaq universitetik. “Çətir universitet” Türkiyə universitetlərində tədris olunan ixtisasların eynilə burada da tədris olunması mənasına gəlir. Məsələn, Orta Doğu Texniki Universitetinin Kompüter mühəndisliyi fakültəsinin proqramı eynən burada tətbiq olunur. İstanbul Texniki Universiteti Sənaye mühəndisliyi fakültəsinin proqramı eyni qaydada sənaye mühəndisliyi ixtisasında keçirilir. Hacettepe Universitetinin Qida mühəndisliyi fakültəsinin dərsləri TAU-nun qida mühəndisliyi ixtisasında tələbələrə keçilir. Burada Türkiyədən gələn müəllimlər dərs deyirlər. Orta Doğu Texniki Universitetində Kompüter mühəndisliyi fakültəsinin müəllimləri Türkiyədə necə dərs deyirlərsə, Azərbaycanda da eyni dərsi keçirlər. Eynilə İstanbul Texniki Universitetinin Sənaye mühəndisliyi fakültəsinin müəllimləri buraya gəlib mühazirələr oxuyurlar. Hacettepe Universitetinin Qida mühəndisliyi fakültəsinin professorları da mühazirə oxumaq üçün buraya gəlirlər. Ona görə də bu baxımdan Türkiyə-Azərbaycan Universiteti modeli dünyada ilk dəfə həyata keçirilir. Bizim digər universitetlərdən fərqimiz budur. Yəni, biz Türkiyənin ən yaxşı universitetlərini Azərbaycana gətiririk və onları Türkiyə-Azərbaycan Universitetində birləşdiririk.

-TAU-da tədris prosesinin gedişi barədə nə deyə bilərsiniz?

- Burada tədris 100 faiz ingilis dilində aparılır. Qəbul etməliyik ki, tədrisin keyfiyyətinin yüksək olması üçün dünyada qəbul edilən dil kimi təhsil ingilis dilində olmalıdır. Tələbələrimiz Azərbaycanın Dövlət İmtahan Mərkəzinin imtahan qaydaları ilə qəbul olunurlar. Daha sonra onlar ingilis dilində səviyyə imtahanı verirlər. Tələb olunan balı toplayırlarsa, birinci kursdan tədrisə başlayırlar. Səviyyə imtahanında uğur qazana bilməyən tələbələr ingilis dilindən hazırlıq dərslərinə davam edirlər. Bu hazırlıq proqramı bir il davam edir. Payız semestrindən başlayır, yaz semestrində bitir. Daha sonra ingilis dili biliyi imtahanında yoxlanılan və həmin imtahandan uğurla keçən tələbələr birinci kursa davam edirlər. Hazırlıq kursu istisna olmaqla, təhsilimiz dördillikdir. Hazırda kompüter mühəndisliyi ixtisasında təhsil alan birinci kurs tələbələri var. Qida mühəndisliyi ixtisası üzrə də birinci kursumuz var. Amma sənaye mühəndisliyi ixtisası üzrə birinci kurs açılmadı. O ixtisasa qəbul olunan tələbələrimiz hazırlıq kursundadır.

-Türkiyə-Azərbaycan Universitetində daha hansı ixtisasların açılması nəzərdə tutulur?

-Hazırda mövcud olan kompüter mühəndisliyi, sənaye mühəndisliyi və qida mühəndisliyi ixtisaslarıdır. Bu ixtisaslar bizim Himayəçilər şurasının qərarlarına uyğun olaraq açılır. Himayəçilər şurasına Azərbaycandan elm və təhsil naziri Emin Əmrullayev rəhbərlik edir. Türkiyə tərəfdən isə YÖK sədri Erol Özvar rəhbərlik edir. Biz Himayəçilər şurasına öz təkliflərimizi veririk. Onların qərarları müzakirələr nəticəsində müəyyən olunur. Bu səbəbdən də Türkiyə-Azərbaycan Universitetində daha hansı ixtisasların açılması haqqında danışmaq bir qədər tezdir.

-Noyabr ayında tələbələrin Türkiyəyə səfəri təşkil olundu. Belə səfərlərin davamı olacaqmı?

-Bildiyiniz kimi, noyabr ayında Azərbaycanda COP29 tədbiri keçirilib. Biz bunu, əslində, bir fürsət kimi qiymətləndirdik. Çünki Azərbaycanda tədris onlayn formatda aparılırdı. Dedik ki, tələbələrimizi Türkiyəyə aparaq, Hacettepe Universitetini, Orta Doğu Texniki Universitetini, İstanbul Texniki Universitetini ziyarət etsinlər. Oradakı müəllimlərlə də tanış olsunlar. Tələbələr Türkiyədə təhsil alan gənclərlə tanış olub ünsiyyət qura bilsinlər. Arzum odur ki, əgər şərait yaranarsa, bu universitetə qəbul olan tələbələrimizi hər il Türkiyəyə aparaq.

-Türkiyə-Azərbaycan Universitetinin qəbul prosedurlarında hansısa dəyişiklik olacaqmı?

-Hazırda Türkiyə-Azərbaycan Universitetinə qəbul Dövlət İmtahan Mərkəzinin qaydalarına əsasən həyata keçirilir. Ötən il kompüter mühəndisləri üçün 500, sənaye və qida mühəndisləri üçün 450 bal olaraq baza balları müəyyənləşdirdik. Lakin qəbul olan tələbələrimizin hamısı çox yüksək bal topladılar. Kompüter mühəndisliyi üzrə keçid balı 641 olub. Bu da bizim müəyyənləşdirdiyimiz baza balından - 500-dən xeyli yüksəkdir. Sənaye mühəndisliyində keçid balı 544, qida mühəndisliyində isə 453 oldu. Görünən odur ki, savadlı tələbələr bizi seçirlər. Universitetimizin təhsil sisteminə və bizə güvənirlər. Bu, iki dövlətin qardaşlığından yaranmış Türkiyə-Azərbaycan Universitetinin təhsil sisteminə onların güvəndiyini göstərir. Biz onlara layiq olmağa çalışırıq. TAU gələcəkdə beynəlxalq universitet olacaq. Bu istiqamətdə ardıcıl addımlar atılır.