“Yetkinlik yaşına çatmayanlar arasında aqressiv davranış” mövzusunda təlimin açılışı olub
Bakı, 17 mart, AZƏRTAC
Bir uşağın haqqının qorunması gələcəyin ədalətli olmasına verəcəyimiz töhfədir.
AZƏRTAC xəbər verir ki, bu sözləri Ailə, Qadın və Uşaq Problemləri üzrə Dövlət Komitəsinin sədr müavini Aynur Sofiyeva “Yetkinlik yaşına çatmayanlar arasında aqressiv davranış (bullinq)” mövzusunda təlimin açılış mərasimində çıxışı zamanı deyib. O bildirib ki, bullinq bu gün dünyada təkcə bir fərdi və ailəni deyil, bütün cəmiyyəti narahat edən problem, xüsusən uşaqların hüquqlarını pozan görünməz, amma real bir təhdiddir.
Uşaq hüquqlarının qorunmasının, təminatının, eləcə də inkişafının dövlət siyasətinin prioritet istiqamətlərindən biri olduğunu deyən A.Sofiyeva ölkəmizdə bu istiqamətdə həyata keçirilən işlərin daim gücləndirildiyini və uğurlu nəticələr əldə olunduğunu vurğulayıb.
Komitə rəsmisi “Azərbaycan Respublikasının Uşaqlara dair 2020–2030-cu illər üçün Strategiyası”nda dövlətin uşaq məsələləri ilə bağlı hədəflərinin müəyyələşdirildiyini bildirib. Qeyd edib ki, Strategiyadan irəli gələrək bir neçə vacib sənəd layihəsi Komitə tərəfindən hazırlanıb və qəbul olunub. Onun sözlərinə görə, hazırda “Uşaq hüquqları haqqında” Azərbaycan Respublikası Qanunu müasir çağırışlara uyğun olaraq yenidən təkmilləşdirilib və qəbul olunması gözlənilir. Qanun uşaqların müdafiəsi, inkişafı istiqamətində önəmli hüquqi bazanı formalaşdıracaq, eləcə də gələcək fəaliyyət üçün önəmli bir mənbə rolunu oynayacaq.
Dövlət Komitəsinin fəaliyyətinin gələcək xəritəsinin müəyyənləşdirilməsində həyata keçirilən təhlil və araşdırmaların əhəmiyyətini vurğulayan sədr müavini Azərbaycanda məktəblərdə bullinqlə bağlı sorğular keçirildiyini, "Yetkinlik yaşına çatmayanlar arasında aqressiv davranış: Bullinqin aşkarlanması üzrə analitik hesabat" adlı tədqiqat hazırlandığını bildirib. Tədqiqatın nəticələrinə diqqət çəkən A.Sofiyeva əlavə edib ki, effektiv mübarizə üçün hüquqi çərçivələri bilməklə yanaşı, psixoloji biliklər də gücləndirilməli, bu sahədə işləyən mütəxəssislərin bilik və bacarıqları artırılmalıdır.
A.Sofiyeva İstanbul şəhərində imzalanmış “Azərbaycan Respublikası Hökuməti ilə Türkiyə Respublikası Hökuməti arasında ailə, qadın və uşaq məsələləri üzrə siyasət sahəsində Əməkdaşlıq Protokolu ilə bağlı Fəaliyyət Planı”na əsasən çoxistiqamətli əməkdaşlıqdan bəhs edib. O, qardaş ölkədən dəvət olunmuş ekspert tərəfindən iki gün ərzində keçiriləcək təlimin müvafiq sahədə müsbət nəticələr verəcəyini bildirib və təlimin işinə uğurlar arzulayıb.
Təlim Türkiyənin Sakarya Universitetinin İnsan və toplum bilimləri fakültəsinin Sosial xidmət Bölməsinin müəllimi professor Mehmet Zafer Danış tərəfindən iştirakçılara yetkinlik yaşına çatmayanlar arasında aqressiv davranış, uşaqların bullinqə məruz qalması, bullinqin növləri və s. haqqında məlumat verməsi ilə davam edib.
Təlimdə Bakı və Abşeron-Xızı Regional Təhsil İdarəsinin tabeliyində fəaliyyət göstərən ümumtəhsil müəssisələrinin psixoloqları, Penitensiar Xidmətin və Sosial Xidmətlər Agentliyinin əməkdaşları iştirak edirlər.
Bölmənin digər xəbərləri
