Kişineu, 24 aprel (AZƏRTAC). Aprelin 27-də Qaqauz Yerində - Moldovanın cənubunda yerləşən Muxtar Ərazi Qurumunda Ana Dili Günü keçiriləcəkdir.

Komrat bələdiyyəsinin mərkəzi meydanında Qaqauz Dili Gününə həsr edilmiş tədbirlərin təntənəli açılış mərasimi olacaqdır. Əvvəlcə, Qaqauz Yeri başqanı Mixail Formuzal və Xalq Məclisinin sədri Dmitri Konstantinov çıxış edəcəklər.

Mərkəzi meydana bitişik ərazidə Qaqauz dilində kitabların və muxtar qurumun rəssamlarının əsərlərinin sərgisi, habelə xalq sənətkarlarının əl işlərinin yarmarkası keçiriləcəkdir. Bayramın qonaqlarını əyləndirmək üçün müxtəlif müsabiqələr və oyunlar, habelə bayram konserti təşkil olunacaqdır.

Zeynal Ağazadə

AZƏRTAC-ın xüsusi müxbiri

Kişineu