Qars-İğdır-Naxçıvan dəmir yolu Naxçıvanın beynəlxalq ticarət şəbəkəsinə inteqrasiyası üçün mühüm layihədir - ŞƏRH
Naxçıvan, 28 aprel, Nail Əsgərov, AZƏRTAC
Prezident İlham Əliyevin 2022-ci il 22 iyul tarixli Sərəncamı ilə təsdiq olunmuş “2022-2026-cı illərdə sosial-iqtisadi inkişaf Strategiyası”nda ölkənin tranzit-logistika imkanlarının artırılması xüsusi hədəflərdən biri kimi müəyyən edilib. Bu istiqamətdə beynəlxalq əhəmiyyətli Zəngəzur dəhlizi və onun tərkib hissəsi olan Qars-İğdır-Naxçıvan dəmir yolu mühüm infrastruktur layihəsidir. Ümumilikdə, Orta Dəhlizə daxil olan bu layihələr, sadəcə, Türkiyə və Naxçıvanı Azərbaycanın əsas ərazisi ilə birləşdirmək xarakteri daşımır. Eyni zamanda, Avropa ilə Asiya üçün ticarət əlaqələri cəhətdən qlobal əhəmiyyət kəsb edir. Məhz bu dəmir yolunun reallaşması ilə Naxçıvanın iqtisadi, turizm potensialı və logistika imkanları daha da genişlənəcək. Ümumiyyətlə bu, həm iqtisadi, həm də geosiyasi əlaqələr baxımından olduqca mühüm layihədir, Azərbaycanla Türkiyə arasında birbaşa dəmir yolu əlaqəsinin yaradılması deməkdir. Naxçıvanın beynəlxalq ticarət şəbəkəsinə inteqrasiyası üçün də bu dəmir yolu xətti olduqca əhəmiyyətlidir. Bununla eyni zamanda regionda iqtisadi fəallığın artmasına, yeni investisiyaların cəlb olunmasına, turizmin inkişafına və məşğulluğun yüksəlməsinə təkan veriləcək.
Bu sözləri AZƏRTAC-ın bölgə müxbirinə açıqlamasında Naxçıvan Dövlət Universitetinin dosenti, iqtisadçı-ekspert Əli Cabbarov Qars-İğdır-Naxçıvan dəmir yolu layihəsinin Naxçıvana qazandıra biləcəyi iqtisadi üstünlükləri, logistik imkanları və turizmə təsirlərini şərh edərkən deyib.
O qeyd edib ki, həmin dəmir yolu xəttinin istifadəyə verilməsi ilə nəqliyyat xərclərinin azalması, malların çatdırılma müddətinin qısalması və yükdaşıma səmərəliliyinin yüksəlməsi gözlənilir. Hazırda Naxçıvana daşınan yüklər, əsasən, hava və avtomobil nəqliyyatı ilə çatdırılır, bu isə həm baha başa gəlir, həm də operativ deyil. Yeni dəmir yolu ilə Naxçıvandan Türkiyəyə, oradan Avropaya və əks-istiqamətdə mal dövriyyəsi sürətlənəcək. Bu, yerli sahibkarların ixrac imkanlarını artıracaq, kənd təsərrüfatı məhsulları üçün yeni bazarlar açacaq və eyni zamanda, logistik mərkəzlərin yaradılmasında da zəmin rolu oynayacaq. Dəmir yolunun turizmin inkişafına da böyük təsiri olacaq. Naxçıvan zəngin tarixi, mədəni və təbii irsə malik bölgədir. Lakin illərdir burada turizmin inkişafı nəqliyyat məhdudiyyətləri səbəbi ilə ləngiyirdi. Yeni dəmir yolu xətti Naxçıvana quru yolla rahat və sərfəli səyahət imkanları yaradacaq. Qardaş Türkiyədən və digər ölkələrdən turistlərin axını artacaq, turizm servislərinə tələbat yüksələcək.
“Həm Naxçıvan, həm də qardaş Türkiyənin Azərbaycanla həmsərhəd regionlarının iqtisadi göstəricilərində dəmir yolu sayəsində yüksək artımlar olacaq. Region əhalisinin gəlir səviyyəsinin yüksəlməsi və sosial rifahın artması kimi müsbət nəticələr gözlənilir. Bundan əlavə, mədəni əlaqələr də genişlənəcək və nəticədə, dəmir yolunun effektiv istifadəsi ilə logistik infrastrukturun – yükləmə-boşaltma məntəqələrinin, anbarların, gömrük zonalarının yaradılması, turizm infrastrukturunun yenilənməsi, sahibkarlara dəstək proqramlarının reallaşması mümkün olacaq. Ən əsası isə bu layihə bölgədə davamlı sülh və təhlükəsiz mühitə zəmin yaradaraq Naxçıvan üçün yeni bir inkişaf mərhələsinin başlanğıcı olacaq”, - deyə Əli Cabbarov əlavə edib.
Bölmənin digər xəbərləri
