Qax, 22 dekabr, Mustafa Dadaşov, AZƏRTAC

Qax rayonunun təsərrüfatlarında 2023-cü ilin məhsulu üçün payızlıq dən bitkilərinin səpini başa çatıb. Torpaq mülkiyyətçiləri cari mövsümdə 13 min 322 hektar sahəyə toxum səpiblər. Taxıl əkinlərinin 9252 hektarını buğda, 4070 hektarını arpa sahələri təşkil edir. Payızlıq dənlilərin əkin sahəsi əvvəlki mövsümlə müqayisədə 83,5 hektar artıb.

Bu barədə AZƏRTAC-ın bölgə müxbirinə Qax Dövlət Aqrar İnkişaf Mərkəzinin bitkiçilik sektorunun müdiri Eyvaz Aslanov məlumat verib.

Qurum rəsmisinin sözlərinə görə, kampaniya dövründə sahələrə 2432 ton sertifikatlaşmış toxum səpilib. Hazırda taxıl sahələrində zərərvericilərə qarşı kimyəvi mübarizə tədbirləri həyata keçirilir, sahələr suvarılır. İndiyədək 203 hektar sahədə suvarma işləri aparılıb.

Xatırladaq ki, qaxlı fermerlər builki mövsümdə 13 min 238,5 hektar taxıl sahəsindən 42 min 556 ton məhsul tədarük ediblər. Hər hektardan orta hesabla 32,1 sentner məhsul götürülüb.