Astana, 4 dekabr (AZƏRTAC). Qazaxıstanın Bnews.kz internet saytında Bakıda Trans-Avrasiya Super İnformasiya Magistralı (TASİM) layihəsinə dair Anlaşma Memorandumunun imzalanması haqqında material dərc olunmuşdur.

Materialda Azərbaycanda keçirilən “BakuTel-2013” 19-cu Beynəlxalq telekommunikasiya və informasiya texnologiyaları sərgisi çərçivəsində Anlaşma Memorandumunun beş ölkənin operatorlarının rəhbərlərinin iştirakı ilə imzalandığı qeyd edilmişdir.

Məqalədə TASİM-in regional əhəmiyyətli layihə olduğu, Qərbi Avropadan Cənub-Şərqi Asiyaya qədər ölkələri əhatə etdiyi, bu məqsədlə transmilli fiber-optik xətlərin çəkildiyi bildirilmişdir.

Yazıda bu şəbəkənin Avropa və Asiyada əsas informasiya mərkəzlərinin bir araya gətirilməsi, iqtisadi artımın sürətləndirilməsi, həmçinin regionun inkişafında aparıcı rol oynayacağı da diqqətə çatdırılmışdır. Məqalə ilə http://bnews.kz/ru/news/post/174440/ linkində tanış ola bilirsiniz.

İlahə Əhmədova

AZƏRTAC-ın xüsusi müxbiri

Astana