Bakı, 17 yanvar (AZƏRTAC). “Qəbələ”nin 13 yaşadək futbolçulardan ibarət komandası Latviyada “Riga Open Cup 2012” beynəlxalq turnirində iştirak edir.

Klubdan AZƏRTAC-a bildirmişlər ki, turnirdə ilk oyununa çıxan təmsilçimiz “Ventspils” (Latviya) üzərində inamlı qələbə qazanmışdır - 3:1. Oyunda qolları Murad Qayalı, Fərid Nəbiyev və İlkin Abdullayev vurmuşlar.

“Qəbələ”nin ikinci qarşılaşmasında rəqib “Dinamo Riga” (Latviya) komandası olmuşdur. Qarşılıqlı hücumlar şəraitində keçən görüşdə hesab açılmamışdır.

Yanvarın 17-də komandamız “Yelqava” və “Super Nova” (hər ikisi Latviya) klubları ilə üz-üzə gələcəkdir.

Latviyaya güclü qar yağdığı üçün bəzi komandalar paytaxt Riqaya gələ bilməmişlər. Bu səbəbdən turnir 6 komandanın – “Qəbələ”, “Ventspils”, “Riga FC”, “Dinamo Riga”, “Yelqava” və “Super Nova” iştirakı ilə keçirilir.