“QƏBƏLƏ-SAĞLAM MÜHİT” TƏŞKİLATI SOSİAL YÖNÜMLÜ LAYİHƏLƏR REALLAŞDIRIR
AZƏRTAC xəbər verir ki, “Qəbələ-sağlam mühit” təşkilatı rayonda sosial-iqtisadi problemlərin həlli istiqamətində bir sıra layihələr həyata keçirməkdədir.
İçməli su və suvarma sistemlərinin bərpası, arıçılığın, meyvəçiliyin, kiçik və orta sahibkarlığın inkişaf etdirilməsi məqsədi ilə kreditlər verən təşkilat İsveçrə Əməkdaşlıq və İnkişaf Təşkilatı ilə qrant müqaviləsi əsasında layihələr reallaşdırır. Qurum “Azərbaycanın dağ regionlarında davamlı inkişaf proqramı” çərçivəsində artıq bir çox sosial yönümlü layihələri gerçəkləşdirmişdir. Bu layihələr, əsasən, gəlir gətirən sahələrin inkişafı və kiçik infrastrukturun bərpası ilə əlaqədardır.
Bugünədək təşkilat rayonun Zarağan kənd 1 nömrəli orta məktəbinə 120 şagird stulu vermiş, Zarağan, Daşlıca, Mıxlıqovaq və Kötüklü kəndlərində çay və arxlar üzərində yeni körpülər salmış, Yemişanlı, Əmirvan, Bunud, Həzrə, Mamaylı, Qəmərvan, Çarxana və Oğuz rayonunun Mollalı kəndinə içməli su xətti çəkmiş, Zarağanda yeni artezian quyusu qazdırmışdır.
Hazırda Kürd kəndinə içməli su xəttinin çəkilişi, Soltannuxa kəndindəki arxın üzərində yeni körpünün tikintisi başa çatmaq üzrədir. Layihələrin icrasında yerli özünüidarəetmə orqanlarının imkanlarından da istifadə olunur. Təşkilat gələcəkdə heyvandarlığın, meyvəçiliyin, əkinçiliyin inkişafı, kiçik istehsal müəssisələrinin yaradılması məqsədi ilə əhaliyə kreditlər verməyi də planlaşdırır.
Bölmənin digər xəbərləri
