Qəbələdə stend atıcılığı üzrə Beynəlxalq Qran-Pri yarışları keçiriləcək
Qəbələ, 30 aprel, Şahnəzər Bəşirov, AZƏRTAC
“Qəbələ” Atıcılıq Klubu növbəti dəfə möhtəşəm idman yarışlarından birinə ev sahibliyi edəcək.
Klubun mətbuat xidmətinin rəhbəri İlham Əhmədov AZƏRTAC-ın bölgə müxbirinə bildirib ki, mayın 7-dən 13-dək Qəbələ rayonunda ulu öndər Heydər Əliyevin anadan olmasının 95 illik yubileyinə həsr olunmuş stend atıcılığı üzrə Beynəlxalq Qran-Pri yarışları keçiriləcək. “Qəbələ” Atıcılıq Klubunun təşkilatçılığı, Azərbaycan Atıcılıq Federasiyasının, Gənclər və İdman Nazirliyinin dəstəyi ilə keçiriləcək yarışlarda 8 ölkədən 100-ə yaxın idmançı, eləcə də rəsmi qonaqlar iştirak edəcək.
“Qəbələ” Atıcılıq Klubunun idman bazası olan stend və ox atıcılığı kompleksində təşkil ediləcək beynəlxalq yarışın iştirakçıları arasında dünyanın tanınmış atıcıları, dünya və Avropa çempionları, Olimpiya oyunlarının qalibləri olacaq.
Bir həftə davam edəcək mötəbər yarışda idmançılar 6 dəst medal uğrunda mübarizə aparacaqlar. Yarışın rəsmi açılış mərasimi mayın 8-də keçiriləcək.
Bölmənin digər xəbərləri
