Qədim və müasir Naxçıvan ukraynalı qonaqlarda zəngin təəssürat yaradıb
Naxçıvan, 1 may, AZƏRTAC
Görkəmli oftalmoloq-alim, akademik Zərifə xanım Əliyevanın anadan olmasının 95-ci ildönümü münasibətilə Ukraynanın İrpen şəhərində fəaliyyət göstərən Akademik Zərifə xanım Əliyeva adına 12 nömrəli xarici dillər üzrə ixtisaslaşmış ümumtəhsil məktəbinin bir qrup müəllimi Naxçıvan Muxtar Respublikasında səfərdə olub. Səfər çərçivəsində qonaqlar Naxçıvanın gəzməli-görməli yerləri ilə tanış olub, muxtar respublikanın təhsil, mədəniyyət, səhiyyə müəssisələri ilə maraqlanıblar. Mayın 1-də qonaqların muxtar respublikaya səfər başa çatıb.
Nümayəndə heyətinin üzvləri səfər təəssüratlarını AZƏRTAC-ın Naxçıvan bürosunun müxbiri ilə bölüşüblər.
Valentina Antonenko (Akademik Zərifə xanım Əliyeva adına 12 nömrəli xarici dillər üzrə ixtisaslaşmış ümumtəhsil məktəbinin direktoru): “Mən, ilk növbədə, bu səfərin təşkilində bizə göstərdiyi köməyə görə Naxçıvan Muxtar Respublikası Ali Məclisinin Sədri Vasif Talıbova öz minnətdarlığımı bildirirəm. Biz burada muxtar respublikanın bir çox təhsil və mədəniyyət müəssisələrində olduq, Duzdağ Fizioterapiya Mərkəzinə getdik. Naxçıvan çox qədim tarixə və mədəniyyətə malikdir. Buradakı insanlar öz tarixinə, dəyərlərinə böyük sevgi ilə sahib çıxır, onu təbliğ edir və tanıtdırır. Məsələn, biz Şərq memarlığı incilərini özündə əks etdirən və hazırda bərpa olunan Qarabağlar Türbə Kompleksi ilə tanış olduq. Bu kompleksin timsalında tarixi abidələrə göstərilən qayğı dövlətinizin tarixi keçmişinizə verdiyi önəmin ifadəsidir. Naxçıvan həm tarixi keçmişi və mədəniyyəti, həm də müasir sürətli inkişafı ilə bizi valeh etdi”.
Lyudmila Arbuzina (məktəbin dərs hissə müdiri): “Sizin ölkəniz və xalqınız haqqında kifayət qədər məlumatlıyıq. Azərbaycan, eləcə də, hazırda səfərdə olduğumuz Naxçıvan Muxtar Respublikası böyük inkişaf yolu keçib. Biz burada olarkən Naxçıvanın bir çox tarixi abidələrini ziyarət etdik, muzeylərdə, eyni zamanda, bir çox ümumtəhsil məktəblərində olduq. Təhsil ocaqlarının hamısı yaraşıqlı, müasir, yeni dövrün texnoloji vasitələri ilə təmin olunub. Bu, onu göstərir ki, Naxçıvanda təhsilə böyük diqqət göstərilir, dövlət tərəfindən nə lazımdırsa, edilir. Eyni zamanda, bu dəstəyi digər sahələrdə də görmək mümkündür. Duzdağ Fizioterapiya Mərkəzi müasir şəraiti ilə gözoxşayan mühüm sağlamlıq mərkəzidir. Öyrəndik ki, hər il dünyanın müxtəlif ölkələrindən müalicə olunmaq üçün buraya gəlirlər. Məhz belə bir mərkəz Naxçıvanın tanıdılmasında, onun hərtərəfli inkişafında əhəmiyyətli rol oynayır. Bir sözlə, gördüyümüz hər bir təhsil, mədəniyyət ocağı, eləcə də gözəlliyi ilə diqqətimizi cəlb edən Naxçıvan şəhəri bizdə çox zəngin təəssüratlar yaratdı və Ukraynaya qayıtdıqdan sonra bu təəssüratları məktəbimizin kollektivi ilə bölüşəcəyik”.
Alla Çumak (məktəbin müəllimi): “Bu, mənim Naxçıvana ikinci səfərimdir, ilk dəfə 2010-cu ildə gəlmişdim. Aradan 8 il keçib, bu dövr ərzində Naxçıvan çox dəyişilib, yeni binalar tikilib, yaşıllıq sahələri artıb. Ən çox xoşuma gələn isə Naxçıvanın hansı səmtinə üz tutsan, orada təmizliyin qorunub saxlanmasıdır. İnsanların istiqanlılığı isə bu gözəlliyi daha da artırır. Biz burada müxtəlif muzeylərə baş çəkdik. Heydər Əliyev Muzeyi öz möhtəşəmliyi ilə qürurvericidir, həm də öyrəndik ki, bu muzey görkəmli dövlət xadiminin hələ sağlığında yaradılmış mədəniyyət ocağıdır. Bizə məlumat verdilər ki, Naxçıvana gələn qonaqların böyük əksəriyyəti şəhərlə tanışlığa məhz buradan başlayır. Bundan əlavə, Ordubad şəhərində olduq və bu qədim şəhər də çox xoşumuza gəldi. Tarixi küçələri, möhtəşəm çinar ağacları ilə əhatə olunmuş şəhərdə müasir inkişafı təzahür etdirən yeni tikililər göz oxşayır. Naxçıvanla bağlı danışacağımız çox maraqlı təəssüratlarımız var”.
Oksana Zubenko (məktəbin müəllimi): “Naxçıvan havasının gözəlliyi, küçə və yollarının təmizliyi ilə diqqətimi çəkdi. İnsanların qonaqpərvərliyini isə sözlə ifadə edə bilmirəm, çox mehribandırlar. Bununla yanaşı, demək istəyirəm ki, çox zəngin mətbəxiniz var. Yeməklərinizin dadından doymaq olmur. Naxçıvanı şəhər kimi maraqlı edən digər bir amil isə qədimliklə müasirliyin bir-birini tamamlamasıdır. Məsələn, Möminə xatının şərəfinə tikilmiş möhtəşəm bir tarixi abidədən bir neçə metr uzaqlaşmaq kifayət edir ki, müasir park və yaşıllıqların, yeni binaların əhatəsində olasan. Yaxud bir zamanlar Naxçıvan xanlarının yaşadığı iqamətgahdan ətrafı seyr etmək kifayətdir ki, müasir tikililərin yaratdığı ansamblı görə biləsən. Ümumiyyətlə, Naxçıvanda harada olduqsa, çox zəngin təəssüratlar əldə etdik. Bu qədim Azərbaycan torpağına bir daha gəlməyi düşünürəm”.
Bölmənin digər xəbərləri
