2009-cu il dekabrın 23-də keçirilmiş bələdiyyə seçkiləri ilə əlaqədar Masallı rayon

Boradigah bələdiyyəsinə namizədlər Abdullayev Emin İbrahim oğlu, Fərzullayev

Xasay Səfər oğlu və digərlərinin 2 yanvar 2010-cu il tarixli 378 saylı müraciətinə

baxılması barədə Azərbaycan Respublikası Mərkəzi Seçki Komissiyasının

Q Ə R A R I

2009-cu il dekabrın 23-də keçirilmiş bələdiyyə seçkiləri ilə əlaqədar 71 saylı Masallı kənd seçki dairəsindən Boradigah bələdiyyəsinə namizədlər Abdullayev Emin İbrahim oğlu, Fərzullayev Xasay Səfər oğlu və digərləri Azərbaycan Respublikasının Mərkəzi Seçki Komissiyasına müraciət edərək, dairə üzrə Boradigah bələdiyyəsini əhatə edən 17, 18, 19, 20 və 21 saylı seçki məntəqələrində səsvermənin nəticələrinə görə seçkidə yüksək səs toplamalarını, bu barədə məntəqələrdən onlara səsvermənin nəticələrini əks etdirən möhürlənmiş və imzalanmış protokolların surətlərinin verilməsini, ancaq dairə seçki komissiyası tərəfindən səsvermənin nəticələrinə görə məntəqə seçki komissiyalarının protokollarına əsasən tərtib olunan yekun protokolunda bələdiyyə üzvlüyünə seçilməmələrini göstərərək həmin bələdiyyə üzrə seçkilərin nəticəsinin ləğv edilməsini xahiş etmişlər.

Müraciət Azərbaycan Respublikası Seçki Məcəlləsinin 112-ci və 112-1-ci maddələrinə və “Azərbaycan Respublikasının Mərkəzi Seçki Komissiyasına və dairə seçki komissiyalarına seçki hüquqlarının pozulması ilə əlaqədar şikayət və müraciətlərin verilməsi və onlara baxılması qaydaları haqqında Təlimat”a uyğun olaraq Azərbaycan Respublikası Mərkəzi Seçki Komissiyasının nəzdində ekspert qrupunun üzvü tərəfindən araşdırılaraq bu barədə müvafiq rəy verilmiş və Mərkəzi Seçki Komissiyasının iclasında baxılmışdır.

Mərkəzi Seçki Komissiyasının müvafiq qərarı ilə müraciətin tam, hərtərəfli və obyektiv araşdırılması üçün Seçki Məcəlləsinə uyğun olaraq araşdırma müddəti uzadılmışdır.

Araşdırma ilə müəyyən edilmişdir ki, məsələ ilə əlaqədar dairə seçki komissiyasında aparılmış araşdırma seçki qanunvericiliyinin tələblərinə tam cavab verən səviyyədə olmamışdır. Boradigah bələdiyyəsinə seçkilər üzrə 17, 18, 19, 20 və 21 saylı seçki məntəqələrindən səsvermənin nəticələrinə dair yekun protokolunun maraqlı şəxslərə verilmiş təsdiq edilmiş surətlərinin səsvermənin nəticələrinə dair MnSK-nın yekun protokolları ilə müqayisəli təhlili nəticəsində müəyyən edilən fərqlər seçicilərin iradəsini müəyyənləşdirməyə imkan vermədiyindən müraciətin təmin edilməsi üçün əsaslar yaranmışdır.

Azərbaycan Respublikası Seçki Məcəlləsinin məntəqə seçki komissiyasının vəzifələrini müəyyən edən 37-ci maddəsinin 37.1.8-ci bəndinə əsasən məntəqə seçki komissiyası seçki məntəqəsində səsvermənin nəticələrini müəyyənləşdirir, səsləri hesablayır və səsvermənin nəticələri haqqında protokolları dairə seçki komissiyasına çatdırır. Həmin Məcəllənin 106.6-cı maddəsinə əsasən, səsvermənin nəticələri haqqında məntəqə seçki komissiyasının yekun protokolları bu Məcəllənin 40.2-ci və 40.4-cü maddələrində göstərilən şəxslərin müşahidəsi ilə tərtib olunur. 71 saylı Masallı kənd seçki dairəsinin qeyd edilən seçki məntəqələrində Seçki Məcəlləsinin tələblərinə riayət olunmaması vətəndaşların seçki hüquqlarının pozulması ilə nəticələnmişdir.

Göstərilənlərə əsasən 71 saylı Masallı kənd seçki dairəsi üzrə Boradigah bələdiyyəsinə namizədlərin müraciəti təmin edilməli, həmin bələdiyyəni əhatə edən 17, 18, 19, 20 və 21 saylı seçki məntəqələri üzrə səsvermənin nəticələri etibarsız sayılaraq ləğv edilməli və bələdiyyə üzrə seçkilər etibarsız sayılmalıdır.

Azərbaycan Respublikası Seçki Məcəlləsinin 240.2.1-ci maddəsinə əsasən bələdiyyə üzrə səsvermə zamanı səsvermənin nəticələri etibarsız sayılmış seçki məntəqələrinin sayı həmin bələdiyyənin ərazisində olan seçki məntəqələrinin ümumi sayının 2/5 hissəsindən çoxunu təşkil etdikdə və ləğv edildikdə, həmin seçki məntəqələrində seçicilərin sayı bələdiyyə üzrə qeydə alınmış seçicilərin ümumi sayının 1/4-dən çoxunu təşkil edərsə, bələdiyyə üzrə seçkilər etibarsız sayılır.

Azərbaycan Respublikası Seçki Məcəlləsinin 23.2-ci maddəsinin tələbinə görə aşağı seçki komissiyası tərəfindən vətəndaşların seçki və referendumda iştirak etmək hüquqları pozulduqda və belə bir hal nəticəsində Mərkəzi Seçki Komissiyası müvafiq ərazidə səsvermənin nəticələrini etibarsız hesab etdikdə, Mərkəzi Seçki Komissiyası həmin aşağı seçki komissiyasını buraxa bilər.

Yuxarıda göstərilənləri əsas götürərək, Azərbaycan Respublikasının Mərkəzi Seçki Komissiyası Azərbaycan Respublikası Seçki Məcəlləsinin 19.4-cü, 28.2-ci, 23.2-ci, 37-ci, 106.6-cı, 112-ci, 112-1-ci, 240-cı maddələrinə və “Azərbaycan Respublikasının Mərkəzi Seçki Komissiyasına və dairə seçki komissiyalarına seçki hüquqlarının pozulması ilə əlaqədar şikayət və müraciətlərin verilməsi və onlara baxılması qaydaları haqqında Təlimat”ın 1, 2, 4, 6 və 7-ci bəndlərinə əsasən q ə r a r a a l ı r :

1. 71 saylı Masallı kənd seçki dairəsindən Boradigah bələdiyyəsinə namizədlər Abdullayev Emin İbrahim oğlu, Fərzullayev Xasay Səfər oğlu və digərlərinin 2 yanvar 2010-cu il tarixli 378 saylı müraciəti təmin edilsin.

2. Boradigah bələdiyyəsini əhatə edən 17, 18, 19, 20 və 21 saylı seçki məntəqələri üzrə səsvermənin nəticələri etibarsız sayılaraq ləğv edilsin.

3. Azərbaycan Respublikası Seçki Məcəlləsinin 240.2-ci maddəsinə əsasən Masallı rayon Boradigah bələdiyyəsi üzrə seçkilər etibarsız sayılsın.

4. Azərbaycan Respublikası Seçki Məcəlləsinin 23.2-ci maddəsinə əsasən 71 saylı Masallı kənd seçki dairəsinin 17, 18, 19, 20 və 21 saylı seçki məntəqələrinin məntəqə seçki komissiyaları buraxılsın.

5. Qərar dərc edildiyi gündən qüvvəyə minir.

Sədr Məzahir Pənahov

Katib Natiq Məmmədov

Üzvlər Fuad Cavadov

Ramiz İbrahimov

Validə Kazımova

Qabil Orucov

Tofiq Həsənov

İlham Məmmədov

Nizami Nadirov

Azər Tağıyev

Tamam Cəfərova

Rövşən İsmayılov

Akif Qurbanov

Almas Qəhramanlı

Oktay Hümbətli