Bakı, 21 oktyabr, AZƏRTAC

Molekulyar Biologiya və Biotexnologiyalar İnstitutunda Azərbaycan Respublikasının “Qırmızı kitabı”nın III nəşrinin hazırlanması üzrə işçi qruplarının növbəti toplantısı keçirilib.

Bu barədə AZƏRTAC-a AMEA-dan məlumat verilib. Bildirilib ki, hibrid formada təşkil edilən iclasa AMEA-nın vitse-prezidenti akademik İradə Hüseynova sədrlik edib. İclasda Botanika və Zoologiya institutlarının, Naxçıvan Bölməsi Bioresurslar İnstitutunun, Bakı Dövlət Universitetinin, Gəncə Dövlət Universitetinin, Ümumdünya Təbiəti Mühafizə Fondunun (WWF) Azərbaycan nümayəndəliyinin, Azərbaycan Ornitoloji Cəmiyyətinin və s. təşkilatların botanik və zooloq alimləri, həmçinin Beynəlxalq Təbiətin və Təbii Sərvətlərin Mühafizəsi Birliyinin (IUCN) komissiya üzvü Andrev Rodrigues iştirak ediblər.

Akademik İradə Hüseynova yeni nəşrlə bağlı işlərin sürətləndirilməsinin vacibliyinə diqqət çəkib, AMEA rəhbərliyinin bu istiqamətdə təşkilatlara və alimlərə hər cür dəstək göstərdiyini və bundan sonra da göstərməyə hazır olduğunu bildirib, ötən dövrdə III nəşrin AMEA üzrə redaksiya heyəti, işçi qrupları, alim və mütəxəssislər tərəfindən görülmüş müvafiq işlər, elmi və elmi-təşkilati tədbirlər haqqında iştirakçıları məlumatlandırıb. İradə Hüseynova “Qırmızı kitab”ın III nəşrinin “Azərbaycan Respublikasında 2023-cü ilin “Heydər Əliyev İli” elan edilməsi haqqında” ölkə Prezidentinin 2022-ci il 29 sentyabr tarixli Sərəncamının icrası ilə bağlı AMEA-nın tədbirlər planına salındığını bildirib və kitabın “Heydər Əliyev İli”nə mühüm töhfə olması üçün çox iş görülməli olduğunu vurğulayıb.

Botanika İnstitutunun baş direktoru professor Səyyarə İbadullayeva və şöbə müdiri biologiya elmləri doktoru Aydın Əsgərov, Zoologiya İnstitutunun direktoru vəzifəsini icra edən Ələddin Sadıqov, həmin institutun icraçı direktoru biologiya elmləri doktoru, dosent Elşad Əhmədov “Qırmızı kitab”ın III nəşri üzrə ayrı-ayrı işçi qrupları tərəfindən görülmüş işlərin hesabatını veriblər, oçerklərin əhəmiyyətli bir hissəsinin artıq hazır olduğunu, yeni nəşrə salınması planlaşdırılan növlərin ümumi hazırlanmış siyahılarını nümayiş etdiriblər, eyni zamanda, razılaşdırılmalı məsələlərin də qaldığını bildiriblər və qiymətləndirmələrdə istifadə olunan meyarlardan danışıblar. Həmçinin bildirilib ki, WWF-in Azərbaycan nümayəndəliyi və Zoologiya İnstitutunun təşkilatçılığı ilə Azərbaycan Respublikasının “Qırmızı kitabı”nın III nəşrinə salınacaq növlərin IUCN-in Qırmızı siyahısının kateqoriya və kriterilərinə görə qiymətləndirməsi üçün təlimlər keçirilib. Təlimdə “Qırmızı kitab”ın III nəşrinin hazırlanmasında iştirak edən müxtəlif təşkilatların işçi qruplarının üzvləri iştirak ediblər.

Müzakirələrdə Azərbaycan Ornitoloji Cəmiyyətinin sədri biologiya üzrə fəlsəfə doktoru, dosent Elçin Sultanov, BP şirkətinin ətraf mühitin mühafizəsi və sosial məsələlər üzrə baş məsləhətçisi biologiya üzrə fəlsəfə doktoru Nicat Həsənov, WWF-in Azərbaycan nümayəndəliyinin rəhbəri Elşad Əsgərov, Zoologiya İnstitutunun laboratoriya müdiri biologiya üzrə fəlsəfə doktoru, dosent Təvəkkül İskəndərov və biologiya üzrə fəlsəfə doktoru Hafiz Muxtarov, Bakı Dövlət Universitetinin kafedra müdiri dosent Əbülfəz Tağıyev, Botanika İnstitutunun şöbə müdiri dosent Dilzarə Ağayeva, laboratoriya müdiri Rəşad Səlimov, onlayn formada isə Naxçıvan Bölməsi Bioresurslar İnstitutunun baş elmi işçisi akademik Tariyel Talıbov, Gəncə Dövlət Universitetinin kafedra müdiri AMEA-nın müxbir üzvü Vaqif Novruzov və başqaları iştirak ediblər.

Müzakirələrdə gələcək fəaliyyət istiqamətləri dəqiqləşdirilib, perspektivlərdən və problemlərdən danışılıb, onların həlli ilə bağlı çoxsaylı təkliflər verilib. Çıxışların əsas mövzuları növlər üzrə yazılan oçerklərin və bu oçerklərdə istifadə ediləcək yayılma xəritələrinin ümumi formatı, ədəbiyyat siyahıları, onlara istinadlar və digər bu kimi məsələlər olub.

Müzakirələrə yekun vuran akademik İradə Hüseynova tədbirin və bundan sonra III nəşrin AMEA üzrə redaksiya heyəti, müvafiq işçi qrupları, Ekologiya və Təbii Sərvətlər Nazirliyinin mütəxəssisləri ilə birgə atılacaq addımların əhəmiyyətini vurğulayıb. O, “Qırmızı kitab”la bağlı yekun işlərin optimallaşdırılması üçün işçi qruplarının birgə toplantıların daha sıx-sıx keçirilməsi kimi ümumi razılıqla qarşılanmış təkliflərlə çıxış edib. Akademik İradə Hüseynova Ekologiya və Təbii Sərvətlər Nazirliyinin mütəxəssisləri ilə məsləhətləşmələrin davam etdiriləcəyini diqqətə çatdırıb, mövcud planların icrasının intensivləşdirilməsi istiqamətində tövsiyə və tapşırıqlarını verib.