“Qlobal Qalxan” proqramı çərçivəsində 2-ci təlim kursu keçirilir
Bakı, 27 avqust (AZƏRTAC). Avqustun 27-də Dünya Gömrük Təşkilatının (DGT) Bakı şəhərindəki Potensialın Gücləndirilməsi üzrə Regional Ofisində “Qlobal Qalxan” proqramı çərçivəsində 2-ci təlim kursu işə başlamışdır.
Azərbaycan Dövlət Gömrük Komitəsindən AZƏRTAC-a bildirilmişdir ki, tədbirə Azərbaycan, Gürcüstan, Ukrayna, Pakistan, ABŞ, Kanada və Böyük Britaniyalı nümayəndələr, eləcə də Dünya Gömrük Təşkilatının mütəxəssisləri qatılmışlar. DGT-nin Bakı şəhərində Potensialın Gücləndirilməsi üzrə Regional Ofisinin rəhbəri Vitali Mikeladze tədbirin narkotik və partlayıcı maddələrin hazırlanmasında istifadə olunan kimyəvi vasitələrin qanunsuz dövriyyəsinə qarşı mübarizə məsələlərinə həsr olunduğunu bildirmişdir. V.Mikeladze bu il Bakıdakı ofisdə daha iki təlim kursunun keçiriləcəyini də diqqətə çatdırmışdır.
DGT-nin nümayəndə heyətinin rəhbəri Cefri Vikett vurğulamışdır ki, kimyəvi silahların, döyüş sursatlarının, partlayıcı maddələrin, eləcə də narkotik vasitələrin, psixotrop maddələrin və onların prekursorlarının qanunsuz dövriyyəsi ilə mübarizə sahəsində daha effektiv mübarizə aparmaq üçün birgə fəaliyyət vacibdir. Bu baxımdan, tədbirə qatılan iştirakçı ölkələrin sözügedən sahədə əldə etdikləri bilik və təcrübə, eləcə də məlumat mübadiləsi ümumi işə böyük fayda verə bilər.
Təlim kursu avqustun 31-dək davam edəcəkdir.
Bölmənin digər xəbərləri
