Qubada XIX əsrə aid tarixi memarlıq abidəsi olan “Tağlı körpü”nün əsaslı təmirinə başlanılmışdır
Quba, 2 yanvar (AZƏRTAC). Qubada XIX əsrə aid tarixi memarlıq abidələrindən olan “Tağlı körpü”nün əsaslı təmirinə başlanılmışdır.
AZƏRTAC xəbər verir ki, keçmiş mühəndis tikililərindən dövrümüzə qədər qorunub saxlanılmış abidələr içərisində tarixi-memarlıq cəhətdən mühüm əhəmiyyətinə malik olan körpüdə təmir işləri Mədəniyyət və Turizm Nazirliyinin sifarişi əsasında aparılır.
1894-cü ildə Qudyalçay üzərində tikilmiş körpü Quba şəhərinin mərkəzi ilə Qırmızı qəsəbəni birləşdirir. O, zamanın ən dözümlü yol qovşağı olmuş körpüdən müasir dövrdə ağır tonnajlı yük maşınlarının keçməsi tarixi abidəni qəzalı vəziyyətə salmış və artıq 20 ilə yaxındır ki, buradan avtomobillərin hərəkətinə qadağa qoyulmuşdur. Yaxın vaxtlarda körpü yenidən sakinlərin ixtiyarına veriləcəkdir.
Artıq tarixi abidənin dayaqlarının bərkidilməsi işləri yekunlaşmışdır. Sel sularının zərər vurmaması üçün ərazidə bəndin və su tənzimləyici qurğuların inşası da nəzərdə tutulmuşdur.
Nadir memarlıq incisi sayılan və Şərq üslubunda tikilmiş “Tağlı körpü” tarixi görünüşü saxlanılmaqla bərpa ediləcəkdir.
XIX əsrdə Quba qəzasında 7 körpü olmuş, lakin onlardan yalnız “Tağlı körpü” adlanan tikili günümüzə qədər qorunub saxlanılmışdır.
Bölmənin digər xəbərləri
