Qusar, 12 avqust (AZƏRTAC). Londonda keçirilən XXX Yay Olimpiya Oyunlarında Azərbaycanın sərbəst güləşçiləri Toğrul Əsgərovun və Şərif Şərifovun parlaq qələbələri qusarlıların böyük sevincinə səbəb olmuşdur.

Sevincini AZƏRTAC ilə bölüşən rayon sakini Əzimə İsrafilova bu qələbənin Azərbaycan xalqını sevindirdiyini, gənclərimiz üçün örnək olduğunu bildirmişdir.

Şəhər 1 nömrəli məktəbin müəllimi Sənan Orucov isə qeyd etmişdir ki, bu, Azərbaycan Prezidenti İlham Əliyevin gənclərə və idmanın inkişafına göstərdiyi qayğının qürurverici nəticəsidir.

Universal döyüş idman növü üzrə Azərbaycan çempionu İlqar Şərifov isə bildirmişdir ki, böyük qələbələrə yalnız gərgin məşqlərin , peşəkar hazırlığın nəticəsində nail olmaq olar. İdmançılarımıza uğurlar arzulayırıq.