Bakı, 17 sentyabr, Leyla Qurbanova, AZƏRTAC

Sentyabrın 12-də baş vermiş hadisələr bir daha sübut edir ki, Ermənistan 2020-ci il noyabrın 9-da imzalanmış üçtərəfli Bəyanatın müddəalarının icrasından boyun qaçırır və götürdüyü öhdəlikləri həyata keçirmək istəmir. Ermənistan nəinki Moskvada, eyni zamanda, Brüsseldə əldə olunmuş razılaşmaları yerinə yetirmək istəyində olmadığını törətdiyi təxribatlarla göstərir. Əgər Ermənistan həqiqətən də sülh əldə etmək istəyində olsaydı, indiyədək beynəlxalq aləmdə Azərbaycana qarşı kampaniya aparmazdı, sülh danışıqlarını, kommunikasiyaların açılmasını, regionda təhlükəsizliyin təmin olunması istiqamətində irəli sürülən bütün təşəbbüsləri və atılan addımları sabotaj etməzdi. Laçının təhvil verilməsi Ermənistan hakimiyyəti üçün növbəti ağır zərbə oldu və daxili təzyiqləri neytrallaşdırmaq, ictimai rəyi dəyişmək üçün növbəti hərbi-siyasi avantüraya başlanıldı.

Bu sözləri AZƏRTAC-a açıqlamasında “Hüquqi Təhlil və Araşdırmalar” İctimai Birliyinin sədri Ramil İskəndərli deyib.

O qeyd edib ki, Ermənistan rəhbərliyi 44 günlük müharibədən nəticə çıxarmaq əvəzinə, əksinə olaraq ordusunu bərpa etmək istiqamətində iş aparırdı. Azərbaycanın suveren ərazisi olan Qarabağa hərbçilər və silah göndərirdi.

“Təbii ki, belə bir vəziyyətdə Azərbaycan öz ərazi bütövlüyü, suverenliyi və təhlükəsizliyini qorumaq məqsədilə növbəti dəfə Ermənistanın hərbi-siyasi təxribatına cavab vermək üçün adekvat addımlar atmaq məcburiyyətində qalıb. BMT Nizamnaməsinin 51-ci maddəsi hər hansı dövlətin beynəlxalq öhdəliklərini yerinə yetirmədiyi və başqa dövlətin ərazisini işğal etmək üçün hərbi qüvvədən istifadə etdiyi hallarda təcavüz qurbanına özünü fərdi və ya kollektiv şəkildə müdafiə etmək hüququ verir. Bu o deməkdir ki, beynəlxalq hüquq hər bir dövlətin özünümüdafiə haqqını tanıyır”, - deyə Ramil İskəndərli vurğulayıb.

İctimai Birliyin sədri qeyd edib ki, Azərbaycan BMT Nizamnaməsinin 51-ci maddəsinə əsasən, Ermənistanın Azərbaycana qarşı təxribatların qarşısını almaq və ərazilərini qorumaq məqsədilə Azərbaycanın təhlükəsizliyinə təhdid yaradan bütün hərbi təyinatlı obyektləri darmadağın etdi. Ermənistanın bu obyektləri yaxın illərdə bərpa etməsi çətin məsələdir.

Azərbaycan həmin bölgədə bütün nəqliyyat-kommunikasiya sistemini, çox mühüm yüksəklikləri nəzarətə götürdü. Artıq nə indi, nə də gələcəkdə Ermənistan Azərbaycana heç bir real təhlükə yarada bilməyəcək. Ermənistanın ölkəmizə və hərbi bölmələrimizə qarşı ardıcıl həyata keçirdiyi təxribatların hansı acı nəticələrə gətirib çıxaracağını bir daha aydın göründü. Ermənistanın uzun müddətdir qurduğu planları alt-üst etdi.

Digər tərəfdən Azərbaycan beynəlxalq hüquqi baxımdan tam legitim olaraq yalnız hərbi obyektləri hədəf aldığına görə və Ermənistanda yerləşən mülki obyektlərin heç birinə ziyan vurmağına görə, kimsə onu BMT-nin Cenevrə Konvensiyalarını pozmaqda günahlandıra bilməz. 1949-cu il Cenevrə Konvensiyasının 15-ci maddəsinə əsasən, silahlı münaqişədə tərəflərin gecikmədən yaralıları, cəsədləri və xəstələri axtarmaq və toplamaq, qarşı tərəfə təhvil verməsi üçün müvəqqəti atəşkəs olmalıdır.

Vəziyyət imkan verdiyi təqdirdə, atəşkəs və ya atəşin dayandırılması, həmçinin döyüş meydanında qalan yaralıların uzaqlaşdırılması, mübadiləsi və daşınması üçün yerli tədbirlər görülməlidir. Azərbaycan burada da humanitar hüquq qaydalarına riayət edərək birtərəfli qaydada humanitar atəşkəs təklif edib, erməni tərəfdən saxlanılan şəxsləri və cəsədləri təhvil verib. Bu hadisələr bir daha onu göstərdi ki, Ermənistanın Azərbaycanla münasibətdə davamlı sülhə razılaşmaqdan başqa yolu yoxdur.