RUSİYA VƏ GÜRCÜSTAN XİN-LƏRİ İKİTƏRƏFLİ MƏSLƏHƏTLƏŞMƏLƏRİ DAVAM ETDİRƏCƏKLƏR
AZƏRTAC-ın xüsusi müxbiri xəbər verir ki, mayın 16-da Moskvada Rusiya Federasiyası xarici işlər nazirinin müavini, stats-katib Q.Karasin Gürcüstanın dövlət naziri T.Yakobaşvili ilə görüşmüşdür. Elə həmin gün xüsusi tapşırıqlar üzrə səfirlər - Rusiya XİN-in MDB ölkələri ilə münasibətlər məsələlərinə dair xüsusi nümayəndəsi V.Kenyaykin və gürcü-osetin münaqişəsinin həlli üzrə Qarışıq nəzarət komissiyasının Rusiya hissəsinin rəhbəri Y.Popov T.Yakobaşvili ilə məsləhətləşmələr aparmışlar.
RF XİN-in mətbuat və informasiya departamentinin məlumatına görə, tərəflər təhlükə yaradan və təhlükəli inkişafa səbəb ola biləcək gürcü-abxaz və gürcü-osetin münaqişələri zonalarındakı vəziyyəti müzakirə etmişlər. Sözügedən bölgələrdə gərginliyin səviyyəsinin azaldılması, bu istiqamətdə konkret vəzifələrin həlli məqsədi ilə Rusiya-Gürcüstan əlaqələrinin yoluna qoyulması imkanları nəzərdən keçirilmişdir. İkitərəfli məsləhətləşmələrin, o cümlədən tərəflərin müzakirə olunan məsələlərə dair mövqelərində mövcud fikir ayrılıqlarının aradan qaldırılması məqsədi ilə davam etdirilməsi barədə razılıq əldə edilmişdir.
Bölmənin digər xəbərləri
