“ŞAHDƏNİZ” YATAĞINDA GÜNDƏ 14,2 MİLYON KUBMETR QAZ, 30 MİN BARRELDƏN ARTIQ KONDENSAT HASİL OLUNUR
bp-Azərbaycan şirkətindən AZƏRTAC-a bildirmişlər ki, “Şahdəniz” yatağında qaz hasilatının artırılması istiqamətində mühüm tədbirlər həyata keçirilir. Layihənin operatoru bp şirkəti tərəfdaşları ilə birlikdə 2007-ci ilin birinci yarısında əməliyyat xərclərinə 75 milyon dollar, əsaslı xərclərə isə 177 milyon dollar vəsait sərf etmişdir. Bütövlükdə isə 2007-ci ildə layihənin əməliyyat və əsaslı xərcləri üçün müvafiq olaraq 196 milyon dollar və 378 milyon dollar vəsaitin yönəldilməsi nəzərdə tutulmuşdur.
Cari ilin mart ayının əvvəllərindən etibarən “Şahdəniz” yatağından sabit şəkildə hasil edilən qaz Azərbaycan və Gürcüstandakı qaz qəbuletmə məntəqələrinə nəql olunur. İyulda ilk qaz Cənubi Qafqaz boru kəməri vasitəsilə Türkiyənin “BOTAŞ” şirkətinin qaz nəqli sisteminə daxil olmağa başlamışdır. “Şahdəniz” yatağından mərhələ-1 layihəsi çərçivəsində hasil olunan qaz hazırda Azərbaycana, GNQK-yə (Gürcüstan), BOTAŞ-a və BTC şirkətinə satılır.
Hazırda “Şahdəniz” yatağında gündə 500 milyon standart kub futdan çox (təxminən 14,2 milyon kubmetr) qaz və 30 min barreldən artıq kondensat hasil olunur. 2007-ci il ərzində yataqdakı qalan öncə qazma quyuları istismar rejiminə keçirildikdən sonra hasilatın həcmi də artacaq. Bundan əlavə, cari ilin sonlarında platformadan yeni quyuların qazılmasına başlanacaqdır.
2007-ci ildə “Şahdəniz” yatağından orta gündəlik hasilat həcminin isə 8,6 milyard kubmetr qaz və 45 min barrel kondensat təşkil edəcəyi gözlənilir.
Bölmənin digər xəbərləri
