Şamaxı, 17 sentyabr, AZƏRTAC

Şamaxıda Dini Qurumlarla İş üzrə Dövlət Komitəsinin (DQİDK) tabeliyindəki Mənəvi Dəyərlərin Təbliği Fondunun maliyyə dəstəyi, Azərbaycan İlahiyyat İnstitutu (Aİİ) və Şamaxı rayonu Göylər kənd məscidi dini icmasının birgə təşkilatçılığı ilə Qurani-Kərim hafizləri arasında Vətən müharibəsi şəhidi hafiz Elgün Quliyevin xatirəsinə həsr edilmiş müsabiqənin final mərhələsi keçirilib.

AZƏRTAC-ın bölgə müxbiri xəbər verir ki, finalda iştirak etmək hüququ qazanan 10 iştirakçıdan 5 nəfər münsiflər heyətinin qiymətləndirməsi ilə ən yüksək nəticələr əldə edərək qalib adını qazanıblar.

Sonra tədbir iştirakçıları şəhid Elgün Quliyevin ailəsini və məzarını ziyarət ediblər. Ziyarətdən sonra qaliblərin mükafatlandırılması mərasimi keçirilib.

Tədbirdə iştirak edən Fondun icraçı direktoru Mehman İsmayılov, Azərbaycan İlahiyyat İnstitutunun rektoru Aqil Şirinov, prorektoru Mirniyaz Mürsəlov, institutun müəllimi Ənvər Mustafayev, Şamaxı Rayon İcra Hakimiyyətinin nümayəndəsi, dini qurumlarla işin təşkilatçısı Rəşad Əliyev, DQİDK-nın Şamaxı bölgəsi üzrə şöbəsinin müdiri Elnur Mehdiyev və başqaları qalibləri təbrik edib, onlara gələcək fəaliyyətlərində uğurlar arzulayıblar.

Sonda Vətən uğrunda canından keçən şəhidlərimizin əziz xatirəsi yad edilib, onların ruhuna dualar oxunub.