Səbail rayonunda Xəzəri ən çox çirkləndirən axarlar 20-ci sahə, Badamdar və Bayıl qəsəbələrində formalaşır
Bakı, 5 mart, AZƏRTAC
Ekologiya və Təbii Sərvətlər Nazirliyinin Xəzər Kompleks Ekoloji Monitorinq İdarəsinin əməkdaşları növbəti monitorinqləri Binəqədi və Səbail rayonlarının Xəzərsahili ərazilərində keçiriblər. Monitorinqlər zamanı dəniz suyundan nümunələr götürülüb, mikrobioloji təhlillər aparılıb.
İdarənin əməkdaşı Nərmin Babaşova AZƏRTAC-a bildirib ki, monitorinqlərin nəticələrinə görə, Səbail rayonu ərazisində Xəzəri ən çox çirkləndirən axarların 20-ci sahə, Badamdar və Bayıl qəsəbələrində formalaşdığı qeydə alınıb.
Onun sözlərinə görə, bu ərazilərdəki “Mambo Beach Hotel”, “Xəzər”, “Dəniz”, “Dərya” istirahət mərkəzlərində və ətrafdakı yaşayış massivlərində formalaşan tullantı suları mərkəzləşdirilmiş kanalizasiya şəbəkəsinə qoşulmaması səbəbindən təmizlənmədən dənizə axıdılır. Son illər yaşayış massivlərinin genişlənməsi isə təmizlənməmiş tullantı sularının həcminin artması ilə nəticələnib: “Binəqədi rayonunda da vəziyyət eynidir. Rayonun Xocasən qəsəbəsində yerləşən “Golden Water” və “El Babtürk” məhdud məsuliyyətli cəmiyyətlərində, “Bərəkət 98” firmasında və digər müəssisələrdə, eləcə də yaşayış massivlərində əmələ gələn tullantı suları da təmizlənmə prosesi keçmədən Xocasən gölünə, oradan da dənizə axıdılır.
Keçirilən monitorinqlərin və aparılan analizlərin nəticəsi bunu deməyə əsas verir ki, həmin obyektlərdən dənizə axıdılan tullantı sularda kimyəvi və bioloji çirkləndiricilərin miqdarı normadan çoxdur”.
Nazirlik rəsmisi qeyd edib ki, hər bir fiziki və hüquqi şəxs, rayon icra hakimiyyəti orqanları və bələdiyyələr çirklənmə mənbələrinin qarşısının alınması üçün tez bir zamanda ciddi tədbirlər görməlidirlər.
Bölmənin digər xəbərləri
