Sədr: “Gənc qızların təhsilinə dəstək” layihəsi çərçivəsində 350-yə yaxın iştirakçı ali təhsil alır
Bakı, 23 iyun, AZƏRTAC
Təhsilin İnkişafı Fondunun təşkilatçılığı ilə reallaşdırılan “Gənc qızların təhsilinə dəstək” proqramı artıq dörd ildir ki, icra olunur. Bu müddət ərzində layihə çərçivəsində sosial həssas qrupdan olan təxminən 350 qız ali təhsil müəssisələrində təhsil almaq imkanı əldə edib.
AZƏRTAC xəbər verir ki, bu fikirləri Təhsilin İnkişafı Fondunun İdarə Heyətinin sədri Elnur Nəsibov Bakıda keçirilən “Gənc qızların təhsilinə dəstək” layihəsinin iştirakçılarının “Məzun günü”ndə çıxışı zamanı səsləndirib.
O qeyd edib ki, əsas məqsəd sosial bərabərliyi təşviq etmək və aztəminatlı ailələrdən olan qızların ali təhsilə çıxışını genişləndirməkdir: “Bu təşəbbüs gənc qadınların cəmiyyətə inteqrasiyasını və peşəkar inkişafını dəstəkləyir. Eyni zamanda, Fondun həyata keçirdiyi digər bir təşəbbüs – “Parla” təqaüd və inkişaf proqramına 2023–2025-ci illəri əhatə edən dövrdə ümumilikdə 1465 müraciət daxil olub, onlardan yalnız 100 nəfəri proqramdan faydalanmaq imkanı qazanıb. Seçilənlər arasında 5 nəfər şəhid ailəsi üzvü, şəhid yoldaşıdır. Hazırda 14 nəfər proqram məzunu var və onlardan 4-ü artıq işlə təmin olunub”.
E.Nəsibov, həmçinin vurğulayıb ki, Fondun icra etdiyi bu cür sosialyönümlü təşəbbüslərdə özəl sektorun dəstəyi mühüm rol oynayır.
Bölmənin digər xəbərləri
