SƏUDİYYƏ ƏRƏBİSTANINDA GÖRÜŞLƏR
Oktyabrın 22-də Əli Həsənov Səudiyyə İnkişaf Fondunun (SİF) rəhbərliyi ilə görüşmüşdür. Baş nazirin müavini Azərbaycan-Səudiyyə əlaqələrinin yüksək səviyyədə olduğunu bildirmiş, iki ölkə arasında əməkdaşlığın inkişaf etdirilməsində SİF-in əhəmiyyətli rol oynadığını, onun ölkəmizdə həyata keçirilən layihələrdə iştirakının Azərbaycan hökuməti tərəfindən yüksək qiymətləndirildiyini bildirmişdir. Ermənistan-Azərbaycan, Dağlıq Qarabağ münaqişəsinin səbəbləri, indiki vəziyyəti barədə ətraflı məlumat verən Ə.Həsənov Azərbaycanın ədalətli mövqeyinin dünyanın bütün nüfuzlu təşkilatları tərəfindən dəstəkləndiyini xatırlatmışdır. Prezident İlham Əliyevin bu məsələdə tutduğu qətiyyətli mövqeyini bildirmiş, münaqişə nəticəsində doğma yurdlarından didərgin düşmüş 1 milyon nəfərədək qaçqın və məcburi köçkünün vəziyyətinin yaxşılaşdırılması üçün dövlətimiz tərəfindən görülən işlərdən danışmışdır. Qaçqın və məcburi köçkünlər üçün müvəqqəti qəsəbələrin salındığını vurğulayan nümayəndə heyətinin rəhbəri Səudiyyə İnkişaf Fondunun gələcəkdə qaçqın və məcburi köçkünlərlə bağlı layihələrdə iştirakının və bu məqsədlə Fondun xüsusi missiyasının Azərbaycana səfərinin məqsədəuyğunluğunu qeyd etmişdir. O, Azərbaycan hökumətinin humanitar sahədə konkret layihələr təqdim etməyə hazır olduğunu bildirmişdir.
Səudiyyə İnkişaf Fondunun rəhbərliyi Azərbaycanda Fondun iştirakı ilə layihələrin uğurla həyata keçirildiyini qeyd etmiş, Azərbaycanda baş verən hadisələrin ölkəsi tərəfindən yaxından izləndiyini, Krallığın respublikamızla əməkdaşlığı genişləndirməyə daim hazır olduğunu vurğulamışdır.
Ə.Həsənovun təklifinə əsasən, qaçqın və məcburi köçkünlərin vəziyyətinin yüngülləşdirilməsi sahəsində layihələrlə tanışlıq və bu layihələrdə iştirak imkanını öyrənmək məqsədi ilə Fondun xüsusi missiyasının ölkəmizə göndəriləcəyi bildirilmişdir. Məlumat verilmişdir ki, hazırda Azərbaycanda digər sahələrdə, o cümlədən humanitar sahədə layihələrin yerinə yetirilməsi mümkünlüyü fond tərəfindən araşdırılır.
X X X
Həmin gün Ə.Həsənov Ümumdünya İslam Gəncləri Assambleyasının baş katibi doktor Saleh Al-Vuheybi ilə görüşmüşdür.
Dünyada 50 ofisi olan Assambleya barədə qısa məlumat verən Saleh Al-Vuheybi Bakı ofisinin səmərəli və şəffaf fəaliyyəti üçün yaradılan şəraitə görə Azərbaycan hökumətinə minnətdarlığını bildirmişdir.
Əli Həsənov Ümumdünya İslam Gəncləri Assambleyasının Azərbaycanda 1995-ci ildən fəaliyyət göstərdiyini və bu dövr ərzində Azərbaycan hökuməti ilə təşkilat arasında normal işgüzar münasibətlərin qurulduğunu söyləmişdir. O, Azərbaycanda mövcud olan problemləri öyrəndiklərinə və bunların həlli sahəsində fəaliyyətlərinə görə Assambleyanın rəhbərliyinə təşəkkür etmiş, Ermənistan-Azərbaycan, Dağlıq Qarabağ münaqişəsinin həllində hazırkı vəziyyət barədə məlumat vermişdir.
Əli Həsənov Assambleyanın baş katibi Saleh Al-Vuheybini Azərbaycana rəsmi səfərə dəvət etmişdir. Eyni zamanda, qaçqın və məcburi köçkünlərin vəziyyəti ilə yerində tanış olmaq, bu problemi dünya ictimaiyyətinin diqqətinə bir daha çatdırılması məqsədi ilə körfəz ərəb dövlətlərinin aparıcı humanitar təşkilatları rəhbərlərinin iştirakı ilə Bakıda yüksək səviyyəli beynəlxalq konfransın keçirilməsi təklif olunmuşdur.
X X X
Hər iki görüşdə Səudiyyə tərəfinə qaçqınların və məcburi köçkünlərin həyat səviyyəsinin yaxşılaşdırılması sahəsində dövlət və beynəlxalq humanitar təşkilatlar tərəfindən görülmüş işlərə dair ərəb dilində hazırlanmış materiallar, fotoalbomlar və videofilmlər təqdim olunmuşdur. Səfər ölkənin kütləvi informasiya vasitələrində geniş işıqlandırılır.
Azərbaycan nümayəndə heyətinin Səudiyyə Ərəbistanı Krallığına səfəri davam edir.
Bölmənin digər xəbərləri
