Bakı, 28 sentyabr, AZƏRTAC

Soçidə Müstəqil Dövlətlər Birliyinin (MDB) iştirakçısı olan dövlətlərin əmək, məşğulluq və əhalinin sosial müdafiəsi üzrə Məşvərət Şurasının növbəti iclası keçirilib.

İclasda Azərbaycan, Belarus, Qazaxıstan, Qırğızıstan, Rusiya, Tacikistan, Özbəkistan, Ermənistan, MDB-nin iştirakçısı olan dövlətlərin Parlamentlərarası Assambleyası, Həmkarlar İttifaqları Ümumi Konfederasiyası, Dövlətlərarası Statistika Komitəsi və Birliyin İcraiyyə Komitəsi, eləcə də əməyin normallaşdırılması sahəsində işlərin metodiki və təşkilati-texniki təminatı sahəsində və əməyin normallaşdırılması üzrə kadrların hazırlanması, yenidən hazırlanması və ixtisasartırma sahəsində əsas təşkilatların nümayəndələri iştirak ediblər.

AZƏRTAC xəbər verir ki, bu barədə MDB-nin İcraiyyə Komitəsinin mətbuat xidməti məlumat yayıb.

İclasın gedişində Şuranın üzvləri 15 məsələyə baxıblar. Onların arasında – ölkələrdə sosial-əmək vəziyyəti və bu sahədə görülən tədbirlər, 2024-cü ildə Müstəqil Dövlətlər Birliyində Könüllülük hərəkatı ilinin keçirilməsinə hazırlıq, MDB ölkələrinin müvəqqəti əlillik, hamiləlik və doğuş üçün müavinətlərin təmin edilməsi ilə bağlı qanunvericilik və hüquq tətbiqetmə təcrübəsi yer alıb.

İclasda MDB-nin iştirakçısı olan dövlətlərin 2021-2025–ci illər üçün əməyin normallaşdırılması sahəsində əməkdaşlığının konseptual əsaslarının həyata keçirilməsi üzrə əsas Tədbirlər Planının icrası, Birlik və dünya ölkələrində platforma məşğulluğu və özünüməşğulluq məsələləri və onların mümkün tənzimlənməsi üzrə təkliflər müzakirə olunub.

MDB PA-nın Sosial siyasət və insan hüquqları üzrə Daimi komissiyasının nümayəndələri sosial-əmək sahəsində sənədlərin layihələrinin işlənib hazırlanması və razılaşdırılması barədə danışıblar.

Bundan başqa, görüşdə əmək və məşğulluq sahəsindəki vəziyyətin təhlili, MDB-nin İqtisadi İnkişaf Strategiyasının 2030-cu ilə qədərki dövr üçün birinci mərhələsinin həyata keçirilməsi üçün Tədbirlər Planının icrası, əməkdaşlığın müqavilə-hüquqi bazasının inventarlaşdırılması və yenilənməsi, işçilərlə yaşadıqları dövlətdən kənarda baş verən istehsalat qəzalarının araşdırılması qaydası haqqında 1994-cü il 9 dekabr tarixli Sazişə dəyişikliklərin edilməsi üçün informasiya resursu kimi MDB ölkələrinin siyahıyaalınmasına aid mövzular nəzərdən keçirilib.