REGİONLAR
Stend atıcılığı üzrə Beynəlxalq Qran-Pri yarışlarında Azərbaycan idmançıları 1 qızıl, 3 gümüş və 1 bürünc medal qazanıblar VİDEO
















Qəbələ, 10 may, Şahnəzər Bəşirov, AZƏRTAC
Qəbələ rayonunun Bum qəsəbəsindəki Stend və Ox Atıcılığı Kompleksində ulu öndər Heydər Əliyevin anadan olmasının 95-ci ildönümünə həsr olunmuş stend atıcılığı üzrə Beynəlxalq Qran-Pri yarışlarının səngər stend üzrə qalibləri məlum olub.
AZƏRTAC-ın bölgə müxbiri xəbər verir ki, mayın 10-da qadın, kişilər və gənclər arasında səngər stend yarışlarının final mərhələsi keçirilib. Kişilərin yarışında tanınmış stend atıcısı, rusiyalı Olimpiya çempionu Aleksey Alipov 47 xalla qızıl, Azərbaycan idmançısı Tamerlan Məmmədov 46 xalla gümüş, Rusiya atıcısı Aleksey Quliayev 36 xalla bürünc medal qazanıb. Bu yarışda Əli Hüseynli 5-ci yeri tutub.
Qadınların yarışında isə rusiyalı Nataliya Zvaqinseva birinci, Azərbaycan atıcısı Aydan Camalova ikinci, Ukrayna atıcısı Alyona Axotska üçüncü yeri tutub.
Gənclərin final yarışında isə Azərbaycan idmançıları digər ölkələrdən olan rəqiblərini üstələyiblər. Belə ki, Sabir Mehdizadə birinci, Mirmömin Ağazadə ikinci, Vaqif Məmmədov üçüncü yeri tutub.
Sonra qaliblərin mükafatlandırılması mərasimi olub. İdmançılara medalları Qəbələ Rayon İcra Hakimiyyətinin başçısı Səbuhi Abdullayev və stend atıcılığı üzrə Olimpiya çempionu Zemfira Meftahətdinova təqdim edib.
Mayın 10-da dairəvi stend atıcılığı üzrə idmançıların məşq prosesi də olub. Sabah bu növ üzrə yarışlara start veriləcək.
Qeyd edək ki, “Qəbələ” Atıcılıq Klubunun təşkilatçılığı, Azərbaycan Atıcılıq Federasiyasının, Gənclər və İdman Nazirliyinin dəstəyi ilə keçirilən yarışlarda Azərbaycan, Türkiyə, Gürcüstan, Ukrayna, Özbəkistan, Rusiya, İran, BƏƏ və Bəhreyndən 70 idmançı iştirak edir. Azərbaycan bu mötəbər yarışda 26 idmançı ilə təmsil olunur.
Mayın 12-dək davam edəcək mötəbər yarışda idmançılar 6 dəst medal uğrunda mübarizə aparacaqlar.