SU SƏRFİNİN ÖLÇÜLMƏSİNDƏ YENİ TEXNOLOGİYADAN İSTİFADƏ OLUNUR
Ekologiya və Təbii Sərvətlət Nazirliyinin mətbuat xidmətindən AZƏRTAC-a bildirmişlər ki, “Azərbaycan Respublikasında Hidrometeorologiyanın İnkişaf Proqramı”na uyğun olaraq hidrometeorologiya işlərinin təkmilləşdirilməsi davam etdirilir.
MDB ölkələri içərisində Azərbaycanda ilk dəfə olaraq ABŞ-ın “SonTec” firmasının istehsalı olan ADP cihazı vasitəsilə, ultrasəs metodu ilə Kür çayında nümunəvi su sərfi ölçülmüşdür. Su sərfi ölçülərkən çayın bütün eni boyu hər 2-3 metrdən, vertikal üzrə isə hər 40 santimetrdən bir axının sürəti dəqiqləşdirilir, eyni zamanda dərinlik müəyyən edilir, çayın en kəsiyinin profili çıxarılır. Cihaz motorlu qayıqda yerləşdirilən kompyuterlə idarə olunur, bütün məlumatlar operativ olaraq ekranda canlandırılır və arxiv faylına yazılır.
Ultrasəs metodu ilə isə su sərfi tez, asan və dəqiq ölçülür. Milli Hidrometeorologiya Departamentində hazırda 2 belə cihaz vardır ki, bunlar da, Kür, Araz və Qanıx çaylarında su sərfinin daha dəqiq, vaxtında, təhlükəsiz və asan ölçülməsinə imkan verir. Bu cihazların tətbiqi hidrologiya elmi-tədqiqat işlərinin aparılmasına da böyük təkan verəcəkdir.
Bölmənin digər xəbərləri
