Sumqayıt, 17 oktyabr (AZƏRTAC). Sumqayıtda Azərbaycan Respublikasının Prezidenti yanında Gənclər Fondunun dəstəyi ilə “Top ustası” futbol festivalı açılmışdır. 

AZƏRTAC xəbər verir ki, mərasimdə festivalın əhəmiyyətindən danışılmışdır.

Bildirilmişdir ki, futbol festivalında gənclərin müstəqil olaraq formalaşdırdığı 8 komanda iştirak edir. Olimpiya sistemi üzrə keçiriləcək yarışlara 64 gənc fəal iştirakçı kimi qatılacaqdır.

Qeyd olunmuşdur ki, Azərbaycan Respublikasının Prezidenti yanında Gənclər Fondu tərəfindən belə layihələrin dəstəklənməsi gənclərin asudə vaxtının səmərəli təşkili, eləcə də idmana marağın artırılması, sağlam həyat tərzinin təbliği baxımından olduqca təqdirəlayiqdir.

Sonra futbol festivalının ilk oyunu keçirilmişdir. “Dental dizayn” və “MinA” komandalarının qarşılaşmasından ikincilər 3:2 hesablı qələbə ilə ayrılmışlar.