MƏDƏNİYYƏT
Tanınmış jurnalist Ağəddin Mansurzadənin xatirəsinə həsr olunmuş “Ömür bitsə də…” kitabının təqdimatı olmuşdur

Bakı, 20 noyabr (AZƏRTAC). Noyabrın 20-də Azərbaycan Mətbuat Şurasında ədəbi ictimaiyyətin nümayəndələrinin iştirakı ilə tanınmış jurnalist, istedadlı yazıçı-publisist, naşir Ağəddin Mansurzadənin xatirəsinə həsr olunmuş “Ömür bitsə də…” kitabının təqdimat mərasimi keçirilmişdir.
AZƏRTAC xəbər verir ki, “Ömür bitsə də…” kitabının tərtibçisi və redaktoru mərhum jurnalistin oğlu Orxan Mansurzadə, məsləhətçiləri Əməkdar Jurnalist Dağbəyi İsmayılov və Mehman Fərzullayevdir. Kitabda 200-dən çox tanınmış insanın Ağəddin Mansurzadə haqqında ürək sözləri və xatirələri toplanmışdır.
Tədbirdə Mətbuat Şurasının sədri Əflatun Amaşov dövrümüzün aktual problemlərindən bəhs edən yüzlərlə məqalənin, ”Ayağa qalxaq”, Lal Vəli”, “Cənnətdə görüşənədək”, “Bizim bir şeyximiz var”, “Şeyxülislamlıq yolu”, “Vasim Məmmədəliyev zirvəsi”, “Nəsir İmanquliyev məktəbi”, “Özbəkistanda nəyim qaldı” və 30-dan artıq digər irihəcmli kitabın müəllifi Ağəddin Mansurzadənin mənalı həyat yolundan və yaradıcılığından danışmışdır.
Ə.Amaşov ötən əsrin 60-cı illərində ömrünü jurnalistikaya bağlayan, düz yaşamağı özünə peşə seçən Ağəddin Mənsurzadəni “Bakı” və “Baku” axşam qəzetlərindən tanıdığını demişdir. Bildirmişdir ki, sözün əsil mənasında publisist olan Ağəddin Mansurzadə mətbuatda ilk dəfə “Sosialist Sumqayıtı” və “Azərbaycan gəncləri” qəzetlərində çıxış etmişdir. 1970-ci ildə isə “Ədəbiyyat və incəsənət” qəzetində işə qəbul edilməsi ilə onun bütün sonrakı həyatı ədəbiyyata bağlanmışdır.
Qeyd olunmuşdur ki, o, televiziyada, radioda və qəzetlərdə çıxış edərək hər şeyi olduğu kimi deməyə və yazmağa çağırırdı, Ağəddin Mansurzadə Vətən, xalq üçün, Azərbaycan dövləti yolunda qələmi ilə döyüşə hazır olan jurnalistlərdən idi.
Milli Məclisin deputatı, Xalq Şairi Sabir Rüstəmxanlının, Hacı Mirəziz Seyidzadənin, yazıçı-publisist Zemfira Məhərrəmlinin, “Bakı” və “Baku” qəzetləri redaktorunun müavini Ənvər Məşədiyevin çıxışları əsil dost sevgisindən qaynaqlanmışdır.
Bildirilmişdir ki, qələm adamı olmaq, fikir və düşüncəni ağ vərəqdə hamıya sevdirmək heç də bu peşəni sevənlərin hamısına nəsib olmur. Yazıçı-publisist Ağəddin Mansurzadə də yuxusuz gecələri hesabına araya-ərsəyə gətirdiyi yazıları ilə oxucu sevgisi qazananlardandır. Ağəddin Mansurzadənin uzun müddət “Ədəbiyyat və incəsənət” və “Bakı” qəzetlərində işləməsi, yazıçı və şairlər haqqında məqalələrlə mətbuatda çıxış etməsi onun bədii əsəri qiymətləndirmək bacarığını göstərən önəmli faktlardandır. “Ədəbi portretlər”, “Ədəbi söhbətlər”, “Ədəbi mülahizələr” kitablarında toplanan çoxsaylı məqalələrdə Ağəddin Mansurzadənin tədqiqatçılıq bacarığı özünü aydın şəkildə göstərməkdədir. Müxtəlif illərdə Xalq Şairi Bəxtiyar Vahabzadə, Şeyxülislam Hacı Allahşükür Paşazadə və görkəmli jurnalist, çoxlarının sevimli müəllimi olmuş Nəsir İmanquliyev haqqında Ağəddin Mansurzadənin yazıb çap etdirdiyi kitablar onu deməyə əsas verir ki, müəllif öz qəhrəmanlarının həyat və fəaliyyətlərini, yaradıcılıq nümunələrini, ən xarakterik məqamları üzərində dayanmağı, özünəməxsus tərzdə fikir və mülahizə yürütməyi bacaran zəhmətkeş qələm sahiblərindəndir.
Çıxışlarda vurğulanmışdır ki, “Ömür bitsə də…” kitabı Ağəddin Mansurzadə yaradıcılığına və şəxsiyyətinə olan sevginin təzahürüdür.
Tədbirdə, həmçinin Ağəddin Mansurzadənin naşirlik fəaliyyətindən də danışılmışdır. Qeyd olunmuşdur ki, o, ömrünün son illərində qurub yaratdığı “Sumqayıt” nəşriyyatının xətti ilə qələm sahiblərinin, xüsusilə yaradıcılıq yoluna yenicə qədəm qoymuş bir sıra gənc yazarlarının kitablarını nəşr etdirmişdir.
Digər çıxış edənlər də kitabın məziyyətlərindən söhbət açmış, sədaqətli dost, gözəl insan, qayğıkeş ata Ağəddin Mansurzadə barədə xatirələrini bölüşmüşlər.
“Ömür bitsə də…” kitabını ərsəyə gətirən Orxan Mansurzadə isə atasına göstərilən yüksək ehtirama görə tədbir iştirakçılarına minnətdarlığını bildirmişdir.