Tanınmış neftçi Söhrab Salmanova “Şöhrət” ordeni təqdim olunmuşdur
Bakı, 30 dekabr (AZƏRTAC). Dekabrın 30-da Azərbaycan Respublikası Dövlət Neft Şirkətinin (ARDNŞ) prezidenti Rövnəq Abdullayev ölkənin neft-qaz sənayesinin tanınmış simalarından olan Söhrab Salmanov ilə görüşmüşdür.
ARDNŞ-dan AZƏRTAC-a bildirmişlər ki, görüşdə R.Abdulayev S.Salmanovun uzun illər Azərbaycan neft-qaz sənayesinin inkişafı naminə çalışaraq böyük əmək nailiyyətləri qazandığını vurğulamışdır. Qeyd etmişdir ki, S.Salmanov ARDNŞ-in vitse-prezidenti vəzifəsinədək yüksəlmiş, şirkətin inkişafında mühüm xidmətləri olmuşdur. Onun xidmətləri Azərbaycan dövləti tərəfindən yüksək qiymətləndirilmiş və S.Salmanov Prezident İlham Əliyevin 2011-ci il 27 dekabr tarixli Sərəncamı ilə ölkənin neft və qaz sənayesi sahəsində səmərəli fəaliyyətinə görə “Şöhrət” ordeni ilə təltif edilmişdir.
Anadan olmasının 70 illiyi və yüksək dövlət mükafatına layiq görülməsi münasibətilə S.Salmanovu bütün neft-qaz sənayesi işçiləri adından səmimi qəlbdən təbrik edən R.Abdullayev ona ən xoş arzularını çatdırmışdır.
Sonra ARDNŞ-in prezidenti Rövnəq Abdullayev “Şöhrət” ordenini S.Salmanova təqdim etmişdir.
Yüksək dövlət mükafatına layiq görüldüyü üçün Prezident İlham Əliyevə dərin minnətdarlığını bildirən S.Salmanov Vətənimizin iqtisadi qüdrətinin durmadan artırılması, respublikamızın çiçəklənməsi naminə yorulmaz fəaliyyətində dövlətimizin başçısına daha böyük nailiyyətlər arzulamışdır. O, ömrünün mənasını əsası ulu öndər Heydər Əliyev tərəfindən qoyulmuş və bu gün də dövlətimizin müdrik rəhbəri İlham Əliyevin başçılığı ilə uğurla davam etdirilən Azərbaycanın neft strategiyasının qələbələri uğrunda çalışmaqda gördüyünü vurğulayaraq demişdir: Dövlət Neft Şirkəti mənim üçün çox əziz və qiymətlidir. Bu gün ARDNŞ istər ölkə daxilində, istərsə də xaricdə regional və beynəlxalq əhəmiyyətli nəhəng layihələr həyata keçirir. Mən şirkətimizin fəaliyyətini yaxından izləyir, onun hər bir uğuruna sevinirəm. Bu uğurların daha da genişlənməsi naminə şirkətin rəhbərliyinə və onun çoxminli kollektivinə yeni-yeni əmək nailiyyətləri diləyirəm.
Sonda S.Salmanova ARDNŞ-in xatirə hədiyyələri təqdim edilmişdir.
Bölmənin digər xəbərləri
